హైదరాబాద్‌ ఇళ్ల విక్రయాల్లో 38% వృద్ధి

అనరాక్‌

దిల్లీ: దేశంలోని 7 ప్రధాన నగరాల్లో ఈ ఏడాది జనవరి-మార్చిలో ఇళ్ల విక్రయాలు సగటున 14% వృద్ధి చెందాయని, సగటు ధరలూ 10-32% పెరిగినట్లు స్థిరాస్తి సేవల సంస్థ అనరాక్‌ తాజా నివేదికలో తెలిపింది. రానున్న రోజుల్లో గిరాకీ ఇంకా అధికం అయ్యే అవకాశాలు కనిపిస్తున్నాయని పేర్కొంది. ఈ నివేదిక ప్రకారం 7 నగరాల్లో మొత్తం 1,30,170 ఇళ్లు/ఫ్లాట్లు అమ్మడయ్యాయి. ఏడాది క్రితం ఈ సంఖ్య 1,13,775 మాత్రమే. ప్రస్తుత త్రైమాసికంలో నమోదైన అమ్మకాలు, గత పదేళ్లలోనే గరిష్ఠమని అనరాక్‌ ఛైర్మన్‌ అనుజ్‌ పురి తెలిపారు. రూ.1.5 కోట్లు, అంతకు మించి ధర ఉన్న ఇళ్లపై కొనుగోలుదారులు ఆసక్తి చూపిస్తున్నారని వివరించారు.

నగరాల వారీగా..: ముంబయిలో ఇళ్ల విక్రయాలు ఏడాది వ్యవధిలో 34,690 నుంచి 24% వృద్ధితో 42,920 కు చేరాయి. పుణేలో 19,920 నుంచి 15% వృద్ధితో 22,990కు, హైదరాబాద్‌లో 14,280 నుంచి 38% వృద్ధితో 19,660కు చేరాయి. బెంగళూరులో 15,660 నుంచి 14% వృద్ధితో 17,790కు చేరాయి. దేశ రాజధాని దిల్లీలో మాత్రం 17,160 నుంచి 9% తగ్గి 15,650కు, చెన్నైలో 5,880 నుంచి 6% తగ్గి 5,510 కు పరిమితమయ్యాయి. సొంతిల్లు సమకూర్చుకునే ధోరణితో పాటు పెట్టుబడిదారుల నుంచి గిరాకీ పెరగడంతో స్థిరాస్తి రంగంలో వృద్ధి నమోదైందని నివేదిక వెల్లడించింది.