కూకట్‌పల్లిలో 264 ఎకరాలు రూ.3402 కోట్లు!

విక్రయానికి స్వ్కేర్‌స్పేస్‌తో ఒప్పందం

ముంబయి: హైదరాబాద్‌ కూకట్‌పల్లిలో ఉన్న 264.50 ఎకరాల భూమిని రూ.3402 కోట్లకు విక్రయించనున్నట్లు హిందూజా గ్రూప్‌ సంస్థ జీఓసీఎల్‌ కార్పొరేషన్‌ బుధవారం వెల్లడించింది. ఇందుకోసం హైదరాబాద్‌ కేంద్రంగా కార్యకలాపాలు సాగించే స్వ్కేర్‌స్పేస్‌ బిల్డర్స్‌ ప్రైవేట్‌ లిమిటెడ్‌తో ఒప్పందం చేసుకున్నట్లు తెలిపింది. ఈ ఒప్పందంలో భాగంగా 32 ఎకరాల స్థలాన్ని హిందూజా హెల్త్‌కేర్‌ లిమిటెడ్‌ (హెచ్‌హెచ్‌ఎల్‌ - గతంలో హిందూజా ఎస్టేట్స్‌ ప్రైవేట్‌ లిమిటెడ్‌)తో కలిసి అభివృద్ధి చేసేలా జాయింట్‌ డెవలప్‌మెంట్‌ అగ్రిమెంట్‌ (జేడీఏ) కుదుర్చుకున్నట్లు వివరించింది. ఈ ప్రక్రియ అంతా 18 నెలల్లో  పూర్తవ్వాల్సి ఉందని తెలిపింది. ఈ ఒప్పందంలో భాగంగా మొదటి వాయిదా కింద రూ.520 కోట్లను అందుకుంటామని జీఓసీఎల్‌ పేర్కొంది. జేడీఏ కింద అభివృద్ధి చేస్తున్న 32 ఎకరాల్లో    12.50 ఎకరాలను వెంటనే విక్రయిస్తామని వివరించింది. తమకు మొదటి వాయిదాగా అందే రూ.520 కోట్లలో, రూ.160 కోట్లు ఈ 12.50 ఎకరాల అమ్మకం ద్వారానే లభిస్తాయని తెలిపింది. తదుపరి దశల్లో జరిగే విక్రయాల ద్వారా మిగిలిన నిధులు కంపెనీకి చేరతాయని పేర్కొంది.