చెన్నై రిఫైనరీలో ఐఓసీ వాటా పెంపు

దిల్లీ: ఇండియన్‌ ఆయిల్‌ కార్పొరేషన్‌ (ఐఓసీ), దాని అనుబంధ సంస్థ చెన్నై పెట్రోలియం కార్పొరేషన్‌ (సీపీసీఎల్‌) సంయుక్తంగా ఏర్పాటు చేసిన సంస్థ ఆధ్వర్యంలో చెన్నైలో నిర్మిస్తున్న 9 మిలియన్‌ టన్నుల రిఫైనరీలో తన వాటాను 75 శాతానికి పెంచుకోనుంది. ఈ ప్రాజెక్టు వ్యయాలు 12% పైగా పెరగడమే ఇందుకు కారణం. ఐఓసీ, సీపీసీఎల్‌ ఏర్పాటు చేసిన సంయుక్త సంస్థలో ఈ రెండు కంపెనీలకు 25%  చొప్పున వాటాలున్నాయి. మిగతా 50% వాటా ఆర్థిక పెట్టుబడిదార్లకు ఉండాలి. అయితే రిఫైనరీ నిర్మాణ వ్యయాన్ని రూ.29,361 కోట్ల నుంచి 12.3% పెంచి రూ.33,023 కోట్లకు సవరించడానికి బోర్డు సమావేశంలో ఆమోదం లభించిందని గురువారం ఎక్స్ఛేంజీలకు ఐఓసీ సమాచారమిచ్చింది. దక్షిణ భారత్‌లో పెట్రోలియం ఉత్పత్తుల గిరాకీని తీర్చడం కోసం కావేరీ బేసిన్‌లో 9 మి. టన్నుల వార్షిక సామర్థ్యంతో రిఫైనరీ ఏర్పాటుకు 2021  జనవరి 29న ఐఓసీ బోర్డు ఆమోదం తెలిపింది.