ఎంఎస్‌డీతో కాంట్రాక్టు తయారీ చర్చల కొనసాగింపు

అరబిందో ఫార్మా 

ఈనాడు, హైదరాబాద్‌: ఔషధాల కాంట్రాక్టు తయారీ ఒప్పందాల నిమిత్తం బహుళ జాతి ఫార్మా కంపెనీ ఎంఎస్‌డీ (మెర్క్‌ షార్ప్‌ అండ్‌ దోహ్మే సింగపూర్‌ ట్రేడింగ్‌ పీటీఈ లిమిటెడ్‌), తమ అనుబంధ సంస్థ క్యూరాటెక్‌ బయోలాజిక్స్‌ ప్రైవేట్‌ లిమిటెడ్‌ మధ్య జరుగుతున్న సంప్రదింపులు మరో 2 నెలలు  కొనసాగుతాయని అరబిందో ఫార్మా వెల్లడించింది. కాంట్రాక్టు తయారీ ఒప్పందాలు కుదుర్చుకోవడం కోసం కొంతకాలంగా రెండు సంస్థల మధ్య సంప్రదింపులు సాగుతున్నాయి. ఈ నెలాఖరుకు ఈ ప్రక్రియ పూర్తి కావాలి, కానీ పూర్తి చేయలేకపోతున్నారు. అందువల్లే మరో 2 నెలల పాటు గడువు పెంచి, మే నెలాఖరుకు ప్రక్రియను పూర్తి చేయాలని తాజాగా నిర్ణయించినట్లు పేర్కొంది. ప్రధానంగా బయోలాజిక్స్‌ విభాగానికి చెందిన ఔషధాలను ఎంఎస్‌డీ కోసం ఉత్పత్తి చేయడానికి క్యూరాటెక్‌ బయోలాజిక్స్‌ ఆసక్తిగా ఉంది. దీనికి అవసరమైన మౌలిక సదుపాయాలు, సాంకేతిక పరిజ్ఞానాన్ని క్యూరాటెక్‌ బయో సమకూర్చుకుంది.