జనరేటివ్‌ ఏఐలో 3.5 లక్షల మంది టీసీఎస్‌ ఉద్యోగులకు శిక్షణ

ముంబయి: జనరేటివ్‌ ఏఐ నైపుణ్యాల్లో 3.5 లక్షల మంది ఉద్యోగులకు శిక్షణ ఇచ్చినట్లు టాటా కన్సల్టెన్సీ సర్వీసెస్‌ (టీసీఎస్‌) పేర్కొంది. 1.5 లక్షల మంది సిబ్బందికి ఈ నైపుణ్యాలను నేర్పించినట్లు జనవరిలో ప్రకటించిన ఈ సంస్థ, తాజాగా తన ఉద్యోగుల్లో సగం మందికి శిక్షణ ఇప్పించినట్లు పేర్కొంది. ప్రపంచంలోనే అత్యధిక ఏఐ నైపుణ్యాలున్న ఉద్యోగులను కలిగిన కంపెనీల్లో ఒకటిగా టీసీఎస్‌ నిలవగలదని సంస్థ తెలిపింది. ఏఐ, క్లౌడ్‌కు ప్రత్యేకంగా వ్యాపార యూనిట్‌ను ఏర్పాటు చేసిన తొలి ఐటీ కంపెనీగా 2023లో టీసీఎస్‌ నిలిచింది.

విమానయాన కంపెనీలకు సేవలు: విమానం ఆలస్యమైనపుడు లేదా రద్దయినపుడు.. ప్రత్యామ్నాయ మార్గాలను తమ వినియోగదార్లకు సూచించడానికి విమానయాన సంస్థలకు జెన్‌ ఏఐ అప్లికేషన్లనూ టీసీఎస్‌ రూపొందించింది. అమెజాన్‌ వెబ్‌ సర్వీసెస్‌ (ఏడబ్ల్యూఎస్‌) తమను జెనరేటివ్‌ ఏఐ కాంపిటెన్సీ పార్టనర్‌గా గుర్తించిందని టీసీఎస్‌ తెలిపింది.