89% ఉద్యోగులకు సవాళ్లే ప్రేరణ: సర్వే

ముంబయి: భారత్‌లో పనిచేస్తున్న ఉద్యోగుల్లో 89 శాతం మందికి సవాళ్లు, అదనపు బాధ్యతలే అత్యంత ప్రేరణనిస్తాయని ఓ సర్వేలో తేలింది. భారత్‌ సహా 10 దేశాల్లో 4,000కు పైగా ఉద్యోగులు, మేనేజర్లు, ఉన్నత స్థాయి ఎగ్జిక్యూటివ్‌లతో యూకేజీ వర్క్‌ఫోర్స్‌ ఇన్‌స్టిట్యూట్‌ ఈ సర్వేను నిర్వహించింది. దీని ప్రకారం భారత ఉద్యోగులు ఏమనుకుంటున్నారంటే..

• తమ మేనేజర్ల మద్దతు, ప్రోత్సాహం, నాయకత్వం తమను ముందుకు నడిపిస్తోందని ప్రతీ నలుగురిలో ముగ్గురు(72%) తెలిపారు.
• ప్రతీ విషయంలో అధికారం చెలాయించకుండా ఉండే మంచి మేనేజర్‌తోనే అత్యంత ఉత్పాదకతను సాధించగలమని 40 శాతం మంది ఉద్యోగులు అభిప్రాయపడ్డారు. అయితే 78 శాతం మంది మాత్రం పని ఒత్తిడి కారణంగా శారీరకంగా, మానసికంగా అలసి పోతున్నామని చెబుతున్నారు.
• పనిభారాన్ని తగ్గించే పక్షంలో కొంత వేతన కోతకూ సిద్ధమని 64 శాతం మంది ఉద్యోగులు అంటున్నారు. పని-జీవితం మధ్య ఆరోగ్యకరమైన సమతౌల్యం ఉండాల్సిన అవసరాన్ని చాలా వరకు ఉద్యోగులు గుర్తిస్తున్నారని ఇది సూచిస్తోంది.
• ఉద్యోగం అనేది కేవలం బతకడానికే అన్న ధోరణి నుంచి చాలా మంది బయటకు వచ్చారు. తమ సంస్థలో మార్పునకు తామూ అండగా ఉండాలని 72 శాతం మంది నిజాయతీగా కోరుకుంటున్నారు.
• సంస్థ వ్యాపారంపై తమ పాత్ర ఎలా ప్రభావం చూపుతుందన్న విషయాన్ని తెలిసేలా తమ మేనేజర్లు సహాయం చేస్తున్నారని 91% మంది పేర్కొన్నారు.