బలమైన భారత్‌ నిర్మాణ బాధ్యత వ్యాపార వర్గాలదే: ముకేశ్‌ అంబానీ

ముంబయి: వచ్చే దశాబ్దాల్లో పూర్తి అభివృద్ధి చెందిన భారతదేశం(వికసిత భారత్‌) అనే మన ప్రధాని మోదీ నిర్దేశించిన లక్ష్యాన్ని నెరవేర్చడానికి బలమైన, మరింత సమగ్రమైన భారతదేశాన్ని నిర్మించాల్సిన బాధ్యత వ్యాపార వర్గాలపై ఉందని రిలయన్స్‌ ఇండస్ట్రీస్‌ లిమిటెడ్‌ సీఎండీ ముకేశ్‌ అంబానీ అన్నారు. రత్నాభరణాల ఎగుమతుల ప్రోత్సాహక మండలి (జీజేఈపీసీ) నిర్వహించిన ఓ కార్యక్రమంలో ఆయన మాట్లాడుతూ.. రాబోయే కొన్ని దశాబ్దాల్లో ఈ పరిశ్రమ 100 బిలియన్‌ డాలర్ల (రూ.8.3 లక్షల కోట్లు) ఎగుమతుల లక్ష్యాన్ని చేరుకుంటుందన్న విశ్వాసాన్ని వ్యక్తం చేశారు. రత్నాలు, వజ్రాల పరిశ్రమ 40 బి.డాలర్ల ఎగుమతులకు చేరుకోవడానికి, దేశంలో 50 లక్షల ఉద్యోగాలను సృష్టించడానికి గత కొన్ని దశాబ్దాలుగా చేసిన కృషికి అంబానీ అభినందనలు తెలిపారు. చాలా నిరాడంబరంగా ప్రారంభమై.. పలన్‌పూర్‌కు చెందిన వ్యక్తుల నేతృత్వంలో ఈ పరిశ్రమ భారీ పురోగతిని సాధించిందన్నారు. అంబానీ కుటుంబానికి కతియావాడ్‌లో మూలాలున్నాయని, పలన్‌పూర్‌ వాసులతో కలిసి పని చేసే అవకాశాలూ ఉన్నాయని తెలిపారు. తన కోడలు శ్లోకా మెహతా కూడా రోజీబ్లూ అధినేత రస్సెల్‌ మెహతా కుమార్తె అని, ఆమె అంబానీ కుటుంబంలోకి రావడం అదృష్టంగా భావిస్తున్నామని వెల్లడించారు. ఈ కార్యక్రమంలో మెహతాకు మహారాష్ట్ర గవర్నర్‌ రమేశ్‌ చేతుల మీదుగా జీవన సాఫల్య పురస్కారం అందించారు.