1 నుంచి డిజిటల్‌ రూపంలో బీమా పాలసీలు

దిల్లీ: 2024 ఏప్రిల్‌ 1 నుంచి బీమా పాలసీలు కొనుగోలు చేస్తే, ఆయా సంస్థలు డిజిటల్‌ రూపంలోనే పాలసీలను అందించనున్నాయి. భారతీయ బీమా నియంత్రణ, అభివృద్ధి ప్రాధికార సంస్థ(ఐఆర్‌డీఏఐ) ఆదేశాల మేరకు పాలసీదార్ల ప్రయోజనాల పరిరక్షణ కోసం ఈ విధానంలోకి సంస్థలు మారుతున్నాయి. స్టాక్‌ మార్కెట్‌లో డీమ్యాట్‌ తరహాలోనే బీమా పాలసీలకూ డీమెటీరియలైజ్డ్‌ ఫామ్‌లో 4 బీమా రిపాజిటరీలను ఏర్పాటు చేశారు. సీఏఎంఎస్‌ రిపాజిటరీ, కార్వీ, ఎన్‌ఎస్‌డీఎల్‌ డేటాబేస్‌ మేనేజ్‌మెంట్‌(ఎన్‌డీఎంఎల్‌), సెంట్రల్‌ ఇన్సూరెన్స్‌ రిపాజిటరీ ఆఫ్‌ ఇండియాలు వీటిని నిర్వహిస్తాయి.

• ఇ-ఇన్సూరెన్స్‌ ఖాతాలు డిజిటల్‌ రూపంలో పాలసీలను జారీ చేయడం, నిర్వహించడం చేస్తుంటాయి. ప్రైవేటు బీమా సంస్థలు ఇప్పటికే ఇ-ఇన్సూరెన్స్‌ ఖాతాలను పాలసీదార్ల కోసం ప్రారంభించాయి. పాలసీదార్లు ఎలక్ట్రానిక్‌ రూపంలో ఇతర పాలసీల కొనుగోలుకు, దాచుకోవడానికి వీటిని ఎంచుకోవచ్చు.
• ఇ-ఇన్సూరెన్స్‌ ఖాతాను తాజా పాలసీ కొనుగోలు చేసే సమయంలోనే ప్రారంభించవచ్చు. ప్రస్తుతమున్న భౌతిక బీమా పాలసీలనూ ఎలక్ట్రానిక్‌ రూపంలోకి మార్పిడి చేసుకోవచ్చు. ఇ-ఇన్సూరెన్స్‌ ఖాతాను ఉచితంగానే తెరవొచ్చు.
• పాత పాలసీలను మాత్రం భౌతిక రూపం(ఫిజికల్‌ ఫామ్‌)లో కొనసాగించుకొనే అవకాశం కల్పిస్తున్నారు. బీమా పాలసీని కొనుగోలు చేయడానికి ప్రతిపాదన ఫామ్‌ను నింపేటప్పుడు పాలసీదార్లు భౌతిక కాపీని కూడా కోరవచ్చు.