రిలయన్స్‌ గ్యాస్‌ ధర తగ్గింపు

దిల్లీ: కేజీ-డీ6 లాంటి సంక్లిష్ట చమురు క్షేత్రాల నుంచి రిలయన్స్‌ ఉత్పత్తి చేస్తున్న సహజ వాయువు ధరను ప్రభుత్వం స్వల్పంగా తగ్గించింది. ప్రస్తుతం సహజవాయువు మిలియన్‌ బ్రిటిష్‌ థర్మల్‌ యూనిట్‌ (ఎంఎంబీటీయూ) ధర 9.96 డాలర్లుగా ఉండగా.. ఏప్రిల్‌ 1తో ప్రారంభమయ్యే 6 నెలల కాలానికి ధరను 9.87 డాలర్లకు ప్రభుత్వం సవరించింది. అంతర్జాతీయ గ్యాస్‌ ధరలకు అనుగుణంగా ఈ ధరలను నిర్ణయించినట్లు పేర్కొంది. వంటగ్యాస్‌ తయారీకి వినియోగించే గ్యాస్‌ ధరల్లో మాత్రం మార్పులు చేయలేదు. మార్కెట్‌ రేట్ల కంటే 30% తక్కువగా ధరలను నిర్ణయించడమే ఇందుకు కారణం. దేశీయంగా ఉత్పత్తి చేసే సహజవాయువు ధరను ప్రభుత్వం ఏటా రెండు సార్లు- ఏప్రిల్‌ 1న, అక్టోబరు 1న నిర్ణయిస్తుంది. కఠిన క్షేత్రాల నుంచి వెలికితీసే సహజవాయువు ధరలను తగ్గించడం ఇది వరుసగా మూడోసారి. 2022 అక్టోబరు- 2023 మార్చికి 12.46 డాలర్లుగా ఉన్న ధరను 2023 ఏప్రిల్‌-సెప్టెంబరులో 12.12 డాలర్లకు తగ్గించారు.