45 మిలియన్‌ టన్నుల ఇనుప ఖనిజం ఉత్పత్తి: ఎన్‌ఎండీసీ

ఈనాడు, హైదరాబాద్‌: ఎన్‌ఎండీసీ లిమిటెడ్‌ 2023-24 ఆర్థిక సంవత్సరంలో 45.1 మిలియన్‌ టన్నుల ఇనుప ఖనిజం ఉత్పత్తిని అధిగమించింది. ఇంతటి ఉత్పత్తి సాధించిన తొలి ‘మైనింగ్‌ కంపెనీ’గా గుర్తింపు దక్కించుకుంది. 2023-24లో అమ్మకాలు 44.8 మిలియన్‌ టన్నులుగా ఉన్నట్లు ఎన్‌ఎండీసీవెల్లడించింది. 2022-23తో పోల్చితే ఉత్పత్తి 10%, అమ్మకాలు 16% పెరిగాయి. గత ఆర్థిక సంవత్సరం చివరి త్రైమాసికం (2024 జనవరి- మార్చి) లో 13.31 మిలియన్‌ టన్నుల ఉత్పత్తి, 12.54 మిలియన్‌ టన్నుల అమ్మకాలు నమోదయ్యాయి. ఛత్తీస్‌గఢ్‌లోని కిరండేల్‌, బచేలీ గనులతో పాటు కర్ణాటకలోని దోనిమలై గనుల్లో అధిక ఉత్పత్తి వల్ల ఈ ఘనత సాధ్యమైనట్లు వెల్లడించింది. పెల్లెట్ల ఉత్పత్తిలో ఎదురయ్యే అవరోధాలను ముందుగా గుర్తించి, తగిన పరిష్కారాలు చేయడమూ కలిసొచ్చినట్లు వివరించింది. గత ఆర్థిక సంవత్సరంలో రూ.1769 కోట్ల మూలధన వ్యయాన్ని ప్రతిపాదించగా, దీనికి మించి రూ.2,014 కోట్లు వ్యయం చేసింది. సమీప భవిష్యత్తులో 100 మిలియన్‌ టన్నుల వార్షిక ఉత్పత్తి లక్ష్యాన్ని సాధించేందుకు సంస్థ ఉద్యోగులు, అధికారులు సిద్ధం కావాలని ఎన్‌ఎండీసీ సీఎండీ అమితవ ముఖర్జీ సూచించారు.