‘ఒక వాహనం.. ఒక ఫాస్టాగ్‌’ నిబంధన అమల్లోకి

దిల్లీ: ఒక ఫాస్టాగ్‌ను పలు వాహనాలకు వాడటం లేదా ఒక వాహనానికి పలు ఫాస్టాగ్‌లను అనుసంధానం చేయడం లాంటి వాటిని నిషేధించారు. ఇందులో భాగంగా ‘ఒక వాహనం.. ఒక ఫాస్టాగ్‌’ నిబంధనను సోమవారం నుంచి భారత జాతీయ రహదారుల ప్రాధికార సంస్థ (ఎన్‌హెచ్‌ఏఐ) అమల్లోకి తెచ్చింది. పేటీఎం పేమెంట్స్‌ బ్యాంక్‌పై ఆర్‌బీఐ ఆంక్షల నేపథ్యంలో పేటీఎం ఫాస్టాగ్‌ వినియోగదార్లు ఎదుర్కొంటున్న సమస్యను దృష్టిలో ఉంచుకుని, ‘ఒక వాహనం, ఒక ఫాస్టాగ్‌’ నిబంధన అమలు గడువును మార్చి 31 వరకు ఎన్‌హెచ్‌ఏఐ పొడిగించిన సంగతి తెలిసిందే. ‘ఏప్రిల్‌ 1 నుంచి ఒక వాహనానికి ఒకటికి మించి ఫాస్టాగ్‌లను వాడేందుకు అనుమతి లేద’ని సంబంధిత అధికారి తెలిపారు. ఫాస్టాగ్‌ అనేది.. దేశంలో ఎలక్ట్రానిక్‌ టోల్‌ వసూలు వ్యవస్థ. దీనిని ఎన్‌హెచ్‌ఏఐ నిర్వహిస్తోంది. ప్రస్తుతం 8 కోట్ల మందికి పైగా ఫాస్టాగ్‌ వినియోగదార్లు ఉన్నారు. ఎన్‌హెచ్‌ఏఐ చేపట్టిన తాజా చర్య.. ఎలక్ట్రానిక్‌ టోల్‌ వసూళ్ల బలోపేతానికి దోహదం చేయనుంది.