శామ్‌సంగ్‌ ఏఐ గృహోపకరణాలు

వాషింగ్‌ మెషీన్లపై 70% వరకు విద్యుత్‌ ఆదా!

ముంబయి: కన్జూమర్‌ ఎలక్ట్రానిక్స్‌ తయారీ సంస్థ శామ్‌సంగ్‌ ఇండియా ఏఐ ఆధారిత గృహోపకరణాలను విడుదల చేస్తున్నట్లు బుధవారం ప్రకటించింది. వేగంగా పెరుగుతున్న ప్రీమియం అప్లియెన్సెస్‌ విపణిలో వినియోగదార్ల అంచనాలను అధిగమించే లక్ష్యంతో పని చేస్తున్నట్లు కంపెనీ తెలిపింది. బిస్పోక్‌ ఏఐ (కృత్రిమ మేధ)తో రూపొందిన కొత్త శ్రేణి ఉపకరణాలు భారతీయ గృహాల్లో స్మార్ట్‌గా జీవించేందుకు దోహదం చేస్తాయని పేర్కొంది. అలాగే విద్యుత్‌ వినియోగాన్ని తగ్గించుకోవచ్చని తెలిపింది. ఏఐ అల్గారిథమ్‌ ఆధారిత ఉపకరణాలు కావడంతో ఫ్రిడ్జ్‌లపై 10 శాతం వరకు, ఏసీలపై 20 శాతం వరకు, వాషింగ్‌ మెషీన్లపై 70 శాతం వరకు విద్యుత్‌ ఆదా అవుతుందని వివరించింది. ఈ ఉపకరణాలు ఇంటర్నెట్‌ అనుసంధానిత ఇన్‌-బిల్ట్‌తో రూపొందాయని.. కెమేరాలు, ఏఐ చిప్‌ల సాయంతో వినియోగదార్లు వీటిని స్మార్ట్‌థింగ్స్‌ యాప్‌ ద్వారా వినియోగించవచ్చని వెల్లడించింది.