ముంబయి- లండన్‌కు మరో విమాన సర్వీసు: వర్జిన్‌ అట్లాంటిక్‌

భారత విమానయాన విపణిలో ‘అపరిమిత గిరాకీ’ అవకాశాలున్న దృష్ట్యా... అక్టోబరు నుంచి ముంబయి- లండన్‌కు అదనంగా మరో రోజువారీ సర్వీసును ప్రారంభించనున్నట్లు వర్జిన్‌ అట్లాంటిక్‌ తెలిపింది. అయితే ప్రభుత్వం నుంచి లభించే అనుమతులపై ఇది ఆధారపడి ఉంటుందని పేర్కొంది. ప్రస్తుతం లండన్‌ హీథ్‌రోకు దిల్లీ నుంచి రెండు; ముంబయి, బెంగళూరు నుంచి ఒకటి చొప్పున రోజువారీ విమాన సర్వీసులను ఈ సంస్థ నడుపుతోంది. లండన్‌- బెంగళూరు విమాన సర్వీసు మార్చి 31న ప్రారంభమైంది. అలాగే ఇండిగోతో కోడ్‌షేర్‌ భాగస్వామ్యాన్ని కూడా విస్తరించే ఉద్దేశంలో ఉన్నామని పేర్కొంది. ప్రస్తుతం కోడ్‌షేర్‌ భాగస్వామ్యం కింద వర్జిన్‌ అట్లాంటిక్‌ ప్రయాణికులకు అదనంగా 37 గమ్యస్థానాలకు ఇండిగో సర్వీసులను అందిస్తోంది. కోడ్‌షేరింగ్‌ కింద ఒక విమానయాన సంస్థకు తన ప్రయాణికులను తన భాగస్వామ్య విమానయాన సంస్థల ద్వారా ప్రయాణించేందుకు బుక్‌ చేసుకునేందుకు అనుమతి ఉంటుంది. తద్వారా తమ సర్వీసులు లేని గమ్యస్థానాలకు కూడా తమ ప్రయాణికులకు ప్రయాణ సదుపాయాన్ని కల్పించే అవకాశం ఆ విమానయాన సంస్థకు లభిస్తుంది.