2024లో భారత జీడీపీ 6.1% పెరగొచ్చు

మూడీస్‌ అనలిటిక్స్‌ అంచనా

దిల్లీ: 2024లో భారత జీడీపీ 6.1 శాతమే వృద్ధి చెందొచ్చని మూడీస్‌ అనలిటిక్స్‌ అంచనా వేసింది. 2023లో నమోదైన 7.7% వృద్ధి కంటే ఇది బాగా తక్కువ. కొవిడ్‌ సంక్షోభం, అనంతరం ఎదురైన ప్రతికూలతల వల్ల భారత వృద్ధిపై 4% వరకు ప్రభావం పడిందని మూడీస్‌ తెలిపింది. ‘దక్షిణ, ఆగ్నేయాసియా దేశాలు ఈ ఏడాది బలమైన వృద్ధిని నమోదుచేయొచ్చు. కొవిడ్‌ అనంతర పరిణామాల వల్ల, రికవరీలో ఏర్పడిన జాప్యం ప్రభావం చూపొచ్చు’ అని మూడీస్‌ అనలిటిక్స్‌ పేర్కొంది. ‘అపాక్‌ ఔట్‌లుక్‌: లిజనింగ్‌ త్రూ ది నాయిస్‌’ పేరిట సంస్థ నివేదికను వెలువరించింది. ప్రపంచ దేశాలతో పోలిస్తే ఆసియా పసిఫిక్‌ మెరుగ్గా రాణిస్తోందని, గతేడాది ప్రపంచ ఆర్థిక వ్యవస్థ వృద్ధి 2.5% కాగా.. ఆసియా పసిఫిక్‌ 3.8% వృద్ధి సాధించిందని వివరించింది. చైనా, భారత్‌లలో ద్రవ్యోల్బణ అనిశ్చితులు అధికంగా ఉన్నాయని అభిప్రాయపడింది.