42 లక్షల కార్లు అమ్ముడయ్యాయ్‌

2023-24పై సియామ్‌ 

దిల్లీ: మన దేశంలో ప్రయాణికుల వాహనాల (పీవీ-కార్లు, ఎస్‌యూవీలు, వ్యాన్ల) టోకు విక్రయాలు 2023-24లో రికార్డు గరిష్ఠమైన 42,18,746 కు చేరాయి. 2022-23లో కంపెనీల నుంచి డీలర్లకు పంపిణీ అయిన 38,90,114 వాహనాలతో పోలిస్తే ఈ సంఖ్య 8.4% అధికం. మరో 7 లక్షల పీవీలు ఎగుమతి అయ్యాయి. యుటిలిటీ వాహనాలకు భారీ గిరాకీ నమోదుకావడం కలిసొచ్చిందని వాహన పరిశ్రమ సంఘం సియామ్‌ శుక్రవారం వెల్లడించింది. 2022-23తో పోలిస్తే 2023-24లో ద్విచక్ర వాహనాల అమ్మకాలు 13.3% పెరిగి 1,79,74,365కు చేరాయి.

• అన్ని విభాగాల వాహన అమ్మకాలు 2,12,04,846 నుంచి 12.5% వృద్ధితో 2,38,53,463కు చేరాయి. ఎగుమతులు మాత్రం 47,61,299 నుంచి 5.5% తగ్గి  45,00,492కు పరిమితమయ్యాయి.
• ఆర్థిక వృద్ధి వల్లే: దేశ ఆర్థిక వృద్ధి 7.6 శాతంగా నమోదు కావడంతో, వాహన పరిశ్రమ 12.6% వృద్ధిని నమోదు చేయగలిగిందని సియామ్‌ ప్రెసిడెంట్‌ వినోద్‌ అగర్వాల్‌ పేర్కొన్నారు. పీవీ విభాగంలో ఎస్‌యూవీలు సహా యుటిలిటీ వాహన విక్రయాలు 25.8% వృద్ధితో 25,20,691కి చేరాయన్నారు. గ్రామీణ ఆర్థిక వ్యవస్థ ఇంకా పుంజుకోనందున చిన్నకార్లు, ద్విచక్ర వాహన విభాగం ఇంకా సవాళ్లను ఎదుర్కొంటోందని అన్నారు.
• మార్చిలో: పీవీ టోకు విక్రయాలు గతేడాది మార్చి నాటి 2,92,030 కంటే ఈ మార్చిలో 9% పెరిగి  3,17,976కు చేరాయి. ద్విచక్ర వాహన టోకు అమ్మకాలు 12,90,553 నుంచి 14,87,579కు పెరిగాయి. అన్ని విభాగాల్లో మొత్తం వాహనాల పంపిణీ 16,37,048 నుంచి 18,62,309కి చేరిందని సియామ్‌ తెలిపింది.