5 నెలల కనిష్ఠానికి రిటైల్‌ ద్రవ్యోల్బణం

దిల్లీ: దేశీయంగా ఆహార ధరలు తగ్గుముఖం పట్టాయి. మార్చిలో రిటైల్‌ ద్రవ్యోల్బణం 5 నెలల కనిష్ఠమైన 4.85 శాతానికి చేరింది. వినియోగదారు ధరల సూచీ (సీపీఐ) ఆధారిత ద్రవ్యోల్బణం ఈ ఏడాది ఫిబ్రవరిలో 5.09 శాతంగా ఉంది. 2023 మార్చిలో ఇది 5.66 శాతంగా నమోదైంది. ఇంతకు ముందు 2023 అక్టోబరులో అత్యల్పంగా 4.83 శాతంగా ఉంది. ఆహార పదార్థాల ద్రవ్యోల్బణం ఈ ఏడాది ఫిబ్రవరిలో 8.66 శాతంగా ఉండగా, మార్చిలో 8.52 శాతానికి తగ్గింది. ద్రవ్యోల్బణాన్ని 4 శాతం వద్ద (2% ఎక్కువ లేదా తక్కువగా) ఉంచాలని ఆర్‌బీఐ లక్ష్యంగా పెట్టుకుంది.

• మార్చిలో గుడ్లు, సుగంధ ద్రవ్యాలు, పప్పుల ధరలు తగ్గాయి. కూరగాయలు, పళ్ల ధరలు పెరిగాయి. ఇంధన ధరలు కూడా తగ్గాయి.
• మార్చిలో గ్రామీణ ప్రాంతాల్లో సగటు ద్రవ్యోల్బణం 5.45 శాతంగా, పట్టణ ప్రాంతాల్లో 4.14 శాతంగా నమోదైంది. ఒడిశాలో ద్రవ్యోల్బణం అత్యధికంగా 7.05 శాతంగా, దిల్లీలో అత్యల్పంగా 2.29 శాతంగా ఉంది.