వినువీధుల్లో 15.4 కోట్ల మంది విహారం

2023-24లో దేశీయ రద్దీలో 13% వృద్ధి
కరోనాకు ముందు స్థాయిల కంటే అధికం
కంపెనీల నికర నష్టం భారీగా తగ్గొచ్చు: ఇక్రా

దిల్లీ: దేశంలో విమాన ప్రయాణికుల రద్దీ గణనీయంగా పెరుగుతోంది. 2022-23తో పోలిస్తే గత ఆర్థిక సంవత్సరం (2023-24)లో ప్రయాణికుల రద్దీ 13% పెరిగి 15.4 కోట్లకు చేరినట్లు ఇక్రా తాజా  నివేదికలో పేర్కొంది. విమాన పరిశ్రమ నికర నష్టం కూడా రూ.3000-4000 కోట్ల స్థాయికి పరిమితం కావచ్చని తెలిపింది. ఈ నివేదికలోని ముఖ్యాంశాలు..

• కరోనాకు ముందు స్థాయిలను దేశీయ ప్రయాణికుల రద్దీ అధిగమించింది. 2019-20లో 14.2 కోట్ల మంది దేశీయ మార్గాల్లో ప్రయాణించారు. 2024 మార్చిలో దేశీయ విమానాల్లో 1.35 కోట్ల మంది ప్రయాణించారని అంచనా. ఫిబ్రవరిలో ప్రయాణించిన 1.26 కోట్ల మంది కంటే ఈ సంఖ్య 6.9% అధికం. ఏడాదివారీగా చూసినా 4.9% పెరిగింది.
• దేశీయ విమానయాన పరిశ్రమ నికర నష్టం 2023-24, 2024-25లలో రూ.3,000-4,000 కోట్లకు పరిమితం కావొచ్చు. 2022-23లో రూ.17,000-17,500 కోట్ల నష్టం వాటిల్లిన సంగతి తెలిసిందే.
• 2023 మార్చితో పోలిస్తే విమాన సామర్థ్యం గత నెలలో 2% అధికంగా, ఫిబ్రవరితో పోలిస్తే 9% అధికంగా నమోదుకావొచ్చు.
• ఫిబ్రవరితో ముగిసిన 2023-24 తొలి 11 నెలల్లో దేశీయ విమాన సంస్థల్లో అంతర్జాతీయ ప్రయాణికుల రద్దీ 2.7 కోట్లుగా నమోదైంది. 2022-23 ఇదే సమయంతో పోలిస్తే ఇది 25% అధికం. కరోనాకు ముందు (2020 ఏప్రిల్‌-ఫిబ్రవరి) స్థాయి అయిన 2.18 కోట్లతో పోల్చినా ఇది 24% ఎక్కువ.
• దేశీయ, అంతర్జాతీయ ప్రయాణికుల రద్దీలో రికవరీ కొనసాగుతున్నందున విమాన పరిశ్రమపై స్థిరమైన భవిష్యత్‌ అంచనాలను ఇస్తున్నట్లు ఇక్రా పేర్కొంది. 2024-25 లోనూ స్థిర వ్యయాల  కొనసాగుతాయన్న అంచనాలుండడంతో రద్దీ పెరగొచ్చు.