ఓలా ఎస్‌1 ఎక్స్‌ ధర రూ.10,000 వరకు తగ్గింపు

దిల్లీ: ఓలా ఎలక్ట్రిక్‌ ప్రారంభ స్థాయి స్కూటర్‌ ‘ఎస్‌1 ఎక్స్‌’ ధరను రూ.5000- 10,000 వరకు తగ్గిస్తున్నట్లు సంస్థ ప్రకటించింది. ఈ ఏడాది ఫిబ్రవరిలో ఎస్‌1 ఎక్స్‌ స్కూటర్‌ను మూడు వేరియంట్లలో కంపెనీ విడుదల చేసింది. వీటి ధరల శ్రేణి రూ.79,999- 1,09,999 మధ్య ఉంది. తగ్గించిన ధరలు వెంటనే అమల్లోకి వస్తాయని, వీటి డెలివరీ వచ్చే వారం ప్రారంభిస్తామని ఓలా ఎలక్ట్రిక్‌ చీఫ్‌ మార్కెటింగ్‌ అధికారి అన్షుల్‌ ఖండేల్‌వాల్‌ పేర్కొన్నారు. కొత్త ధరల ప్రకారం.. ఎస్‌1 ఎక్స్‌ (4 కిలోవాట్‌ హవర్‌ బ్యాటరీ) ధర రూ.1,09,999 నుంచి రూ.99,999కు తగ్గింది. 3 కిలోవాట్‌ హవర్‌ బ్యాటరీ కలిగిన స్కూటర్‌ ధర రూ.89,999 నుంచి రూ.84,999కు పరిమితమైంది. 2 కిలోవాట్‌ హవర్‌ బ్యాటరీ స్కూటర్‌ ధరను రూ.79,999 నుంచి రూ.69,999 (పరిచయ ధర)కు తగ్గించారు. విద్యుత్‌ వాహనాల వినియోగాన్ని పెంచేందుకే.. స్కూటర్‌ సగటు ధరను రూ.లక్షకు చేర్చినట్లు ఖండేల్‌వాల్‌ అన్నారు.