3 నెలల గరిష్ఠానికి టోకు ధరలు

మార్చిలో 0.53 శాతానికి చేరిక

దిల్లీ: టోకు ధరల సూచీ (డబ్ల్యూపీఐ) ఆధారిత ద్రవ్యోల్బణం మార్చిలో స్వల్పంగా పెరిగి 0.53 శాతంగా నమోదైంది. ఇది మూడు నెలల గరిష్ఠం. కూరగాయలు, బంగాళాదుంపలు, ఉల్లి, ముడి చమురు ధరలు పెరగడమే ఇందుకు కారణం. ఫిబ్రవరిలో టోకు ద్రవ్యోల్బణం 0.20 శాతంగా ఉంది. 2023 ఏప్రిల్‌ నుంచి అక్టోబరు వరకు టోకు ద్రవ్యోల్బణం ప్రతిద్రవ్యోల్బణ స్థితిలోనే ఉంది. గత నవంబరులో సానుకూలంగా మారి 0.26 శాతంగా నమోదైంది. 2023 మార్చిలో ఇది 1.41 శాతంగా ఉంది. కేంద్ర వాణిజ్య, పరిశ్రమల మంత్రిత్వ శాఖ విడుదల చేసిన వివరాల ప్రకారం..

• ఈ ఏడాది మార్చిలో ఆహార పదార్థాల ద్రవ్యోల్బణం స్వల్పంగా పెరిగి 6.88 శాతానికి చేరింది. గతేడాది ఇదే నెలలో ఇది 5.42 శాతంగా ఉంది. కూరగాయల ద్రవ్యోల్బణ రేటు -2.39 శాతం నుంచి గణనీయంగా పెరిగి 19.52 శాతానికి చేరింది.
• బంగాళాదుంపల ద్రవ్యోల్బణ రేటు -25.59% నుంచి 52.96 శాతానికి, ఉల్లిపాయల ద్రవ్యోల్బణం -36.83% నుంచి 56.99 శాతానికి పెరిగింది.
• తృణధాన్యాల ద్రవ్యోల్బణం 12 నెలల గరిష్ఠమైన 9 శాతానికి పెరగ్గా, పప్పు ధాన్యాల ధరల్లో 17.2 శాతం పెరుగుదల నమోదైంది.
• ముడి చమురు ద్రవ్యోల్బణం కూడా 10.26 శాతానికి పెరిగింది. కిందటేడాది మార్చిలో -23.53 శాతంగా ఉంది.