సోనీతో విలీనానికి ఎన్‌సీఎల్‌టీ వద్ద దరఖాస్తు ఉపసంహరణ: జీ

దిల్లీ: సోనీ కంపెనీతో విలీనాన్ని అమలు చేయాలని కోరుతూ జాతీయ కంపెనీల చట్టం ట్రైబ్యునల్‌ (ఎన్‌సీఎల్‌టీ) వద్ద దాఖలు చేసిన దరఖాస్తును ఉపసంహరించుకున్నట్లు జీ ఎంటర్‌టైన్‌మెంట్‌ ఎంటర్‌ప్రైజెస్‌ లిమిటెడ్‌ (జెడ్‌ఈఈఎల్‌) వెల్లడించింది. బోర్డు ద్వారా అందిన న్యాయ సలహా ఆధారంగా ఈ నిర్ణయాన్ని తీసుకున్నట్లు తెలిపింది. ‘వాటాదార్లకు అధిక విలువ సృష్టించేందుకు వృద్ధిపరమైన, వ్యూహాత్మక అవకాశాల మదింపునకు ఈ నిర్ణయం కంపెనీకి ఉపయోగపడుతుంది. యాజమాన్యం వేసే ప్రతి అడుగును వ్యూహాత్మక కార్యాచరణ ద్వారా ఎప్పటికప్పుడు మదింపు చేసేందుకు, సమయానుసరంగా మార్గనిర్దేశం చేసేందుకు బోర్డు ఎల్లప్పుడూ కట్టుబడి ఉంద’ని జెడ్‌ఈఈఎల్‌ తెలిపింది. జీ ఎంటర్‌టైన్‌మెంట్‌ ఎంటర్‌ప్రైజెస్‌, సోనీ గ్రూపు సంస్థలు కల్వర్‌ మ్యాక్స్‌ ఎంటర్‌టైన్‌మెంట్‌, బంగ్లా ఎంటర్‌టైన్‌మెంట్‌ మధ్య కుదిరిన విలీన ఒప్పందం అమలుకు ఆదేశాలివ్వాలంటూ జనవరి 24న ఎన్‌సీఎల్‌టీ ముంబయి ధర్మాసనం వద్ద జెడ్‌ఈఈఎల్‌ దరఖాస్తు సమర్పించింది. అంతకుమందు జెడ్‌ఈఈఎల్‌, తమ భారత సంస్థ విలీనం కోసం కుదుర్చుకున్న 10 బిలియన్‌ డాలర్ల ఒప్పందాన్ని జనవరి 22న సోనీ గ్రూపు రద్దు చేసుకుంది. విలీనానంతర సంస్థకు ఎవరు సారథ్యం వహిస్తారనే విషయంపై సందిగ్థత నెలకొనడం ఇందుకు కారణమైంది. ఈ ఒప్పందం రెండేళ్ల కిందట కుదిరింది.