ఎలక్ట్రానిక్స్‌ పరిశ్రమలో ఉద్యోగాల వెల్లువ

క్వెస్‌ కార్ప్‌ నివేదిక

ముంబయి: దేశీయంగా ఎలక్ట్రానిక్స్‌ పరిశ్రమలో నియామకాలు గణనీయంగా పెరిగాయని క్వెస్‌ కార్ప్‌ నివేదిక వెల్లడించింది. 2023 మార్చితో పోలిస్తే గత నెలలో ఎలక్ట్రానిక్స్‌ పరిశ్రమలో నియామకాలు 154% పెరిగాయని, నైపుణ్య వృద్ధి ఇందుకు ఉపకరించిందని తెలిపింది. టెలికాం రంగంలో నియామకాలకు గిరాకీ (64%) బాగా ఉండటంతో మొత్తం ఎలక్ట్రానిక్స్‌ పరిశ్రమలో ఉద్యోగావకాశాలు పెరిగాయని పేర్కొంది. లైటింగ్‌, వాహన రంగాల్లోనూ చెప్పుకోదగ్గ స్థాయిలో నియామకాలు జరిగాయి. ఈ నియామకాల్లో ప్రాంతాల వారీగా చూస్తే 33% వాటాతో తమిళనాడు అగ్ర స్థానంలో ఉంది. తర్వాత స్థానాల్లో కర్ణాటక, ఉత్తరప్రదేశ్‌, తెలంగాణ ఉన్నాయి. పరిశ్రమ నిపుణుల నుంచి సేకరించిన సమాచారంతో ఈ నివేదిక రూపొందించినట్లు క్వెస్‌ కార్ప్‌ తెలిపింది.

•  ఎలక్ట్రానిక్స్‌ పరిశ్రమలో ముఖ్యంగా తయారీలో వివిధ ఉద్యోగాల్లో మహిళలకు అవకాశాలు పెరిగాయి. మొబైల్‌ తయారీ రంగంలో వీరికి గిరాకీ బాగా ఉంది. తర్వాత స్థానాల్లో రిటైల్‌, సేవల రంగాలు ఉన్నాయి.
• 2025-26 నాటికి 10 లక్షల ఉద్యోగాలు ఈ రంగంలో లభిస్తాయని నిపుణులు అంచనా వేస్తున్నారు. 2025 నాటికి ఎలక్ట్రానిక్స్‌ విపణి పరిమాణం 400 బిలియన్‌ డాలర్ల (సుమారు రూ.33.20 లక్షల కోట్ల)కు పెరుగుతుందని ఆశిస్తున్నారు.