26 శాతం పెరిగిన ఎల్‌ఐసీ ప్రీమియం వసూళ్లు

దిల్లీ: ఈ ఏడాది మార్చిలో ప్రభుత్వ రంగ సంస్థ లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) మొత్తం ప్రీమియం వసూళ్లు రూ.36,300.62 కోట్లుగా నమోదయ్యాయి. 2023 మార్చిలో వసూలైన రూ.28,716.23 కోట్లతో పోలిస్తే ఇది 26.41% ఎక్కువ. ఎల్‌ఐసీ తర్వాత ఎస్‌బీఐ లైఫ్‌ ఇన్సూరెన్స్‌ కంపెనీ ప్రీమియం వసూళ్ల వృద్ధి 24.76 శాతంగా ఉంది. ఐసీఐసీఐ ఫ్రుడెన్షియల్‌ లైఫ్‌ ఇన్సూరెన్స్‌ కంపెనీ 12.58% వృద్ధి నమోదుచేసింది. మరోదిగ్గజ బీమా సంస్థ హెచ్‌డీఎఫ్‌సీ లైఫ్‌ ఇన్సూరెన్స్‌ కంపెనీ  ప్రీమియం వసూళ్లలో 20.05% క్షీణత చవిచూసింది. 2024 మార్చికి ప్రీమియం వసూళ్ల పరంగా ఎల్‌ఐసీకి 58.87% మార్కెట్‌ వాటా ఉంది. పన్ను మినహాయింపుల కోసం వినియోగదారులు బీమా పాలసీలు తీసుకోవడంతో, మార్చిలో బ్రీమా సంస్థల ప్రీమియం వసూళ్లలో వృద్ధి నమోదైందని లైఫ్‌ ఇన్సూరెన్స్‌ కౌన్సిల్‌ తెలిపింది. గత నెలలో ఎల్‌ఐసీ గ్రూప్‌ వార్షిక రెన్యూవబుల్‌ ప్రీమియం 200.62%, గ్రూప్‌ ప్రీమియం 47.17% దూసుకెళ్లాయి. 2023-24లో గ్రూప్‌ వార్షిక రెన్యూవబుల్‌ ప్రీమియం 140.51% వృద్ధితో రూ.843.99 కోట్ల నుంచి రూ.2,029.88 కోట్లకు చేరింది.