నెస్లే సెరిలాక్‌ ఉత్పత్తులపై దర్యాప్తు

ఎఫ్‌ఎస్‌ఎస్‌ఏకు కేంద్రం ఆదేశాలు

దిల్లీ: భారత్‌లో విక్రయమవుతున్న నెస్లే సెరిలాక్‌ ఉత్పత్తులపై దర్యాప్తు చేపట్టాలని ఆహార భద్రత నియంత్రణ సంస్థ ఎఫ్‌ఎస్‌ఎస్‌ఏఐను కేంద్ర వినియోగదారు వ్యవహారాల మంత్రిత్వ శాఖ కోరింది. భారతదేశంలో నెస్లే విక్రయిస్తున్న ఉత్పత్తుల్లో చక్కెర అధికంగా వినియోగించిందన్న స్విస్‌ స్వచ్ఛంద సంస్థ పబ్లిక్‌ ఐ అండ్‌ ఇంటర్నేషనల్‌ బేబీ ఫుడ్‌ యాక్షన్‌ నెట్‌వర్క్‌ (ఐబీఎఫ్‌ఏఎన్‌) నివేదిక వెలువడిన  నేపథ్యంలో ఈ ఆదేశాలొచ్చాయి. భారత్‌ సహా దక్షిణాసియా, ఆఫ్రికా, లాటిన్‌ అమెరికాలోని వర్థమాన దేశాల్లో అధిక చక్కెర ఉన్న ఉత్పత్తులను నెస్లే విక్రయిస్తోందని ఆ నివేదిక ఆరోపించింది. ఈ  నివేదికలోని అంశాలపై నిగ్గుతేల్చాలంటూ, నెస్లేపై దర్యాప్తు చేపట్టాలని ఎఫ్‌ఎస్‌ఎస్‌ఏఐకి లేఖ రాసినట్లు వినియోగదారు వ్యవహారాల కార్యదర్శి, సెంట్రల్‌ కన్జూమర్‌ ప్రొటెక్షన్‌ అథారిటీ(సీసీపీఏ) అధిపతి నిధి ఖరే తెలిపారు.

దేశ పిల్లల ఆరోగ్యం, భద్రతపై ఆందోళనతోనే: జర్మనీ, స్విట్జర్లాండ్‌, ఫ్రాన్స్‌, బ్రిటన్‌ దేశాల్లో విక్రయిస్తున్న సెరిలాక్‌లో మాత్రం చక్కెర వినియోగించకుండా.. భారత్‌లో విక్రయిస్తున్న ఉత్పత్తుల్లో మాత్రం ఒక సర్వింగ్‌కు 2.7 గ్రాముల వరకు చక్కెరను నెస్లే కలుపుతోందని ఆ నివేదిక ఆరోపించింది. అధిక చక్కెర ఉండే ఉత్పత్తుల వల్ల పిల్లల ఆరోగ్యం, భద్రతపై ప్రభావం పడుతుందన్న ఆందోళనల మధ్య ఈ లేఖ రాసినట్లు నిధి ఖరే తెలిపారు.

• నేషనల్‌ కమిషన్‌ ఫర్‌ ప్రొటెక్షన్‌ ఆఫ్‌ చైల్డ్‌ రైట్స్‌(ఎన్‌సీపీసీఆర్‌) కూడా నివేదిక తమ దృష్టికి వచ్చినట్లు.. ఎఫ్‌ఎస్‌ఎస్‌ఏఐకి నోటీసు జారీ చేసినట్లు తెలిపింది.
• గత అయిదేళ్లలో వేరియంట్‌ను బట్టి భారత్‌లోని శిశు ఆహార ఉత్పత్తుల్లో 30 శాతం వరకు యాడెడ్‌ షుగర్‌ను తగ్గించినట్లు గురువారం నెస్లే వివరణ ఇచ్చింది. థాయ్‌లాండ్‌లో విక్రయించే నెస్లే శిశు ఉత్పత్తుల్లో 6 గ్రాముల (ఒక్కో సర్వింగ్‌) చక్కెర ఉండగా.. ఫిలిప్పీన్స్‌లో ఎనిమిదింట అయిదు శాంపిళ్లలో ఇది 7.3 గ్రాములుగా ఉందని ఆ నివేదిక వెల్లడించింది.