తగ్గిన రత్నాభరణాల ఎగుమతులు

2023-24లో రూ.2.65 లక్షల కోట్లు: జీజేఈపీసీ

ముంబయి: గత ఆర్థిక సంవత్సరం (2023-24)లో రత్నాభరణాల ఎగుమతులు 12.17 శాతం తగ్గి రూ.2,65,187.95 కోట్లకు (32,022.8 మిలియన్‌ డాలర్లు) పరిమితమయ్యాయని రత్నాభరణాల ఎగుమతి ప్రోత్సాహక మండలి(జీజేఈపీసీ) వెల్లడించింది. అమెరికాలో అధిక వడ్డీరేట్లు, చైనా రికవరీలో స్తబ్దత కారణంగా రత్నాభరణాల ఎగుమతులు తగ్గాయని జీజేఈపీసీ తెలిపింది. 2022-23లో వీటి ఎగుమతులు రూ.3,01,925.97 కోట్లుగా (37,646.17 మి.డాలర్లు) నమోదయ్యాయి. ‘భారత్‌కు రత్నాభరణాల ఎగుమతుల్లో కీలకమైన అమెరికాలో వడ్డీ రేట్లు ఎక్కువగా ఉండటంతో ఆ దేశ ఆర్థిక వ్యవస్థ నెమ్మదించడం ప్రభావం చూపింది. అలాగే కొవిడ్‌-19 తర్వాత చైనాలో రికవరీ బాగా నెమ్మదించడం కూడా ఎగుమతులు తగ్గేందుకు కారణమైంద’ని జీజేఈపీసీ ఛైర్మన్‌ విపుల్‌ షా వెల్లడించారు.

•  కట్‌ అండ్‌ పాలిష్డ్‌ వజ్రాల ఎగుమతులు రూ.1,76,716.06 కోట్ల (22,046.9 మి.డాలర్లు) నుంచి 25.23% తగ్గి రూ.1,32,128.29 కోట్లకు (15,966.47 మి.డాలర్లు) పరిమితమయ్యాయి. ల్యాబ్‌లో తయారైన పాలిష్డ్‌ వజ్రాల స్థూల ఎగుమతులు రూ.13,468.32 కోట్ల (1,680.22 మి.డాలర్లు) నుంచి 13.79 శాతం తగ్గి రూ.11,611.25 కోట్లకు (1,402.3 మి.డాలర్లు) పరిమితమయ్యాయి.
•  పసిడి ఆభరణాల ఎగుమతులు రూ.76,589.94 కోట్ల (9,538.84 మి.డాలర్లు) నుంచి 20.57% పెరిగి రూ.92,346.19 కోట్లకు (11,140.78 మి.డాలర్లు) చేరాయి. వెండి ఆభరణాల ఎగుమతులు రూ.23,556.71 కోట్ల (2,939.9 మి.డాలర్లు) నుంచి 43% తగ్గి రూ.13,406.1 కోట్లకు (1,616.42 మి.డాలర్లు) పరిమితమయ్యాయి.