జొమాటో ప్లాట్‌ఫాం ఫీజు రూ.5కు పెంపు

హైదరాబాద్‌ సహా పలు నగరాల్లో

దిల్లీ: ఎంపిక చేసిన నగరాల్లో, జొమాటో తన ప్లాట్‌ఫాం ఫీజును ఒక్కో ఆర్డరుకు రూ.5కు పెంచింది. ఇప్పటివరకు ఇది 4 రూపాయలుగా ఉంది. ఇతర నగరాల నుంచి కూడా ఆహారాన్ని డెలివరీ చేసే ‘ఇంటర్‌సిటీ లెజెండ్స్‌’ సేవను తాత్కాలికంగా నిలిపివేసినట్లు కంపెనీ యాప్‌ వెల్లడిస్తోంది. మార్చి 15 నుంచి ఇప్పటి దాకా రూ.227.85 కోట్ల పన్ను కట్టాలంటూ ఈ ఆహార డెలివరీ ప్లాట్‌ఫాంకు నోటీసులు అందాయి. కంపెనీ తన నాలుగో త్రైమాసిక ఫలితాలను ప్రకటించనుండగా, ఈ పరిణామాలు చోటు చేసుకుంటుండడం గమనార్హం. పెంచిన ప్లాట్‌ఫాం ఫీజు హైదరాబాద్‌ సహా దిల్లీ-ఎన్‌సీఆర్‌, బెంగళూరు, ముంబయి తదితర నగరాల్లో అమలు చేయొచ్చని కంపెనీ వర్గాలు చెబుతున్నాయి. ఆగస్టులో ఈ సంస్థ ప్లాట్‌ఫాం ఫీజును ఒక్కో ఆర్డరుకు రూ.2తో మొదలుపెట్టింది. క్రమంగా పెంచుకుంటూ వెళుతోంది.