ఇంటిపై సౌర విద్యుత్‌ వ్యవస్థల ఏర్పాటుకు ఇండియన్‌ బ్యాంక్‌తో టాటా పవర్‌ భాగస్వామ్యం

దిల్లీ: నివాస గృహాల పైకప్పులపై సౌర విద్యుత్‌ వ్యవస్థల ఏర్పాటును ప్రోత్సహించేందుకు, టాటా వపర్‌ సోలార్‌ సిస్టమ్స్‌ ప్రభుత్వ రంగ ఇండియన్‌ బ్యాంక్‌తో భాగస్వామ్య ఒప్పందాన్ని కుదుర్చుకుంది. ప్రధానమంత్రి సూర్య ఘర్‌ ముఫ్తీ బిజిలీ యోజన పథకంలో భాగంగా ఇళ్లపై 3 కిలోవాట్‌ (కేడబ్ల్యూ) సౌరశక్తి విద్యుత్తు వ్యవస్థ ఏర్పాటు చేసుకోవచ్చు. దీంతోపాటు 3 నుంచి 10 కేడబ్ల్యూ వరకూ సౌర విద్యుత్‌ ఫలకాల ఏర్పాటుకూ తమ భాగస్వామ్యం మద్దతు ఇస్తుందని టాటా పవర్‌, ఇండియన్‌ బ్యాంక్‌ వెల్లడించాయి. పీఎం సూర్య ఘర్‌ యోజన కింద రూ.2 లక్షల వరకు రుణానికి 7% వార్షిక వడ్డీ అవుతుంది. 10% మార్జిన్‌ మనీని గృహ యజమానులు భరించాలి. హామీ అవసరం లేకుండా ఈ రుణం లభిస్తుంది. తిరిగి చెల్లించే వ్యవధి పదేళ్ల వరకు ఉంటుంది. 3-10 కిలోవాట్‌ సామర్థ్యం వరకు ఇండియన్‌ బ్యాంక్‌ రుణాలు ఇస్తుంది. అర్హత ఉన్న వినియోగదారులు రూ.6 లక్షల వరకు రుణం తీసుకోవచ్చు. దీనికోసం 20% మార్జిన్‌ మనీ అవసరం అవుతుంది. వడ్డీ రేట్లు 8.4% నుంచి 10.8% వరకు ఉంటాయి.