ఇండిగోలో ఇన్‌ఫ్లైట్‌ వినోదం

దిల్లీ: మే 1 నుంచి దిల్లీ-గోవా విమానాల్లో, తన యాప్‌ ద్వారా ఇన్‌-ఫ్లైట్‌ వినోద కంటెంట్‌ను విమానయాన సంస్థ ఇండిగో ఆవిష్కరించనుంది. మూడు నెలల పాటు ప్రయోగాత్మక పద్ధతిలో దీనిని అందించనున్నారు. దేశీయ విమానాల్లో వినోద కంటెంట్‌ను అందించడం ఇదే తొలిసారి అవుతుంది. విమానంలోని ఎలక్ట్రానిక్‌ పరికరాలకు అంతరాయం కలగకుండా ఉండడం కోసం, విమానం నిర్దిష్ట ఎత్తుకు చేరాక ఈ సేవలను అందజేస్తారు. ఈ సేవలను ఉపయోగించుకోవడానికి ప్రయాణికులు తమ వ్యక్తిగత హెడ్‌ఫోన్స్‌ వాడాలి. నమూనా దశ విజయవంతమయ్యాక పూర్తి స్థాయిలో ఈ సేవలను తీసుకొస్తామని ఇండిగో పేర్కొంది. ఇండిగోకు 350కు పైగా విమానాలుండగా.. రోజుకు 2,000 వరకు రోజువారీ విమాన సర్వీసులను నడుపుతోంది.