కాస్త దిగొచ్చిన బంగారం

ఈనాడు వాణిజ్య విభాగం: ఇటీవలి గరిష్ఠాలతో పోలిస్తే బంగారం, వెండి ధరలు కాస్త దిగొచ్చాయి. ఇరాన్‌-ఇజ్రాయెల్‌ మధ్య ఉద్రిక్తతలు కొంతమేర చల్లారడం ఇందుకు కారణం. మంగళవారం రాత్రి 11 గంటల సమయానికి హైదరాబాద్‌ బులియన్‌ విపణిలో 10 గ్రాముల మేలిమి బంగారం రూ.74,300, కిలో వెండి రూ.83,300 వద్ద ట్రేడ్‌ అవుతున్నాయి. 24 గంటల వ్యవధిలో బంగారం ధర రూ.73,500కు దిగి వచ్చినా మళ్లీ కొంత పెరిగింది. గతవారంలో 24 క్యారెట్ల బంగారం 10 గ్రాముల ధర రూ.76,750 వద్ద గరిష్ఠ స్థాయికి చేరగా, కిలో వెండి      రూ.85,000కు చేరిన సంగతి విదితమే. అంతర్జాతీయంగా ఔన్సు (31.10 గ్రాములు) మేలిమి బంగారం ధర 2,400 డాలర్లను మించగా తాజాగా 2325 డాలర్ల వద్ద కదలాడుతోంది. చైనా కేంద్రబ్యాంక్‌ కొనుగోళ్ల వల్లే ఇంకా అంతర్జాతీయ విపణిలో పసిడి ధర అధికంగా ఉందని, లేకపోతే ఇంకా తగ్గేదని వ్యాపార వర్గాలు చెబుతున్నాయి. సమీప కాలంలో 10 గ్రాముల మేలిమి బంగారం ధర రూ.72,000 స్థాయికి దిగి వస్తుందని అంచనా వేస్తున్నారు.