యాపిల్‌ నుంచి కొత్త ఐప్యాడ్‌లు మే 7న

దిల్లీ: యాపిల్‌ సంస్థ వచ్చే నెల 7న కొత్త ఐప్యాడ్‌లు విడుదల చేసేందుకు కార్యక్రమం ఏర్పాటు చేసింది. ఇందులో ఐప్యాడ్‌ ప్రో, ఐప్యాడ్‌ ఎయిర్‌లను విడుదల చేస్తుందని సంబంధిత వర్గాలు చెబుతున్నాయి. అంతర్జాతీయంగా ఐప్యాడ్‌ల విక్రయాలు తగ్గుతున్న సమయంలో, కొత్త ఐప్యాడ్‌లను యాపిల్‌ విడుదల చేయనుండటం గమనార్హం. డిసెంబరు 30తో ముగిసిన ప్రస్తుత ఆర్థిక సంవత్సర తొలి త్రైమాసికంలో ఐప్యాడ్‌ల విక్రయాలు 25% తగ్గి 7.02 బిలియన్‌ డాలర్ల (సుమారు రూ.58,000 కోట్ల)కు పరిమితమయ్యాయి. ఐఫోన్ల విక్రయాలు కూడా నెమ్మదించాయి. కొత్త ఐప్యాడ్‌ల విడుదలతో గిరాకీ పెంచుకోవాలని యాపిల్‌ భావిస్తున్నట్లు తెలుస్తోంది. ప్రస్తుతం ప్రో, ఎయిర్‌, మినీ, 9, 10వ తరం రెగ్యులర్‌ ఐప్యాడ్‌ మోడళ్లను కంపెనీ విక్రయిస్తోంది. డిసెంబరు త్రైమాసికంలో కంపెనీ నికర విక్రయాల్లో (119.58 బి.డాలర్లు) ఐప్యాడ్‌ల వాటా 5.9 శాతమే. జూన్‌ 10-14 మధ్య ప్రపంచవ్యాప్త డెవలపర్ల సమావేశాన్ని కూడా యాపిల్‌ నిర్వహించేందుకు సిద్ధమవుతోంది.