స్వల్పంగా తగ్గిన ఎల్‌టీఐమైండ్‌ట్రీ లాభం

దిల్లీ: భారతీయ ఐటీ కంపెనీ ఎల్‌టీఐమైండ్‌ట్రీ గత ఆర్థిక సంవత్సరం మార్చి త్రైమాసికంలో రూ.1,100.7 కోట్ల ఏకీకృత నికర లాభాన్ని నమోదు చేసింది. 2022-23 ఇదే త్రైమాసిక లాభం రూ.1,114.1 కోట్లతో పోలిస్తే ఇప్పుడు స్వల్పంగా (1.2%) తగ్గింది. ఇదే సమయంలో కార్యకలాపాల ఆదాయం రూ.8,691 కోట్ల నుంచి 2.32% పెరిగి రూ.8,892.9 కోట్లకు చేరింది. 2023-24 పూర్తి ఆర్థిక సంవత్సరానికి నికర లాభం 4% పెరిగి రూ.4,584.6 కోట్లకు చేరింది. కార్యకలాపాల ఆదాయమూ 7.03% పెరిగి రూ.35,517 కోట్లకు చేరింది.

• ‘గత ఆర్థిక సంవత్సరంలో సవాళ్తున్నా, మంచి పని తీరు కనబరిచాం. పూర్తి ఆర్థిక సంవత్సరానికి డాలర్‌ రూపేణా 4.4% ఆదాయ వృద్ధి సాధించాం. ఎబిటా మార్జిన్‌ 15.7 శాతంగా నమోదైంద’ని ఎల్‌టీఐమైండ్‌ట్రీ సీఈఓ, ఎండీ దేబాషిస్‌ ఛటర్జీ వెల్లడించారు.
• గత ఆర్థిక సంవత్సరంలో కంపెనీకి 5.6 బిలియన్‌ డాలర్ల (సుమారు రూ.46,500 కోట్ల) విలువైన ఆర్డర్లు లభించాయని, 2022-23 ఆర్థిక సంవత్సరంతో పోలిస్తే ఇవి 15.7% అధికమని పేర్కొన్నారు.