హెచ్‌యూఎల్‌ లాభంలో స్వల్ప క్షీణత

మొత్తం డివిడెండు రూ.42

దిల్లీ: ఎఫ్‌ఎమ్‌సీజీ దిగ్గజం హిందుస్థాన్‌ యునిలీవర్‌ ఏకీకృత, గత ఆర్థిక సంవత్సరం నాలుగో త్రైమాసికం (జనవరి-మార్చి)లో రూ.2,561 కోట్ల నికరలాభాన్ని ప్రకటించింది. 2022-23 ఇదే త్రైమాసిక లాభం రూ.2,601 కోట్ల కంటే ఇది 1.53% తక్కువ. నికర విక్రయాలు దాదాపు మార్పు లేకుండా రూ.15,013 కోట్లుగా నమోదయ్యాయి. ప్రతి ద్రవ్యోల్బణం, కమొడిటీ ధరలు తగ్గడం ఈ ఫలితాలకు నేపథ్యమని సంస్థ పేర్కొంది. సమీక్షా త్రైమాసికంలో మొత్తం వ్యయాలు 1.15% పెరిగి రూ.12,100 కోట్లకు చేరాయి. మొత్తం ఆదాయం రూ.15,375 కోట్ల నుంచి స్వల్పంగా పెరిగి రూ.15,441 కోట్లకు చేరుకుంది. మార్చి త్రైమాసికంలో స్థూల మార్జిన్‌ 350 బేసిస్‌ పాయింట్ల మేర మెరుగైంది.

విభాగాల వారీగా: గృహ సంరక్షణ విభాగం 1.27% వృద్ధి చెంది రూ.5,709 కోట్ల ఆదాయాన్ని నమోదు చేసింది.

• సౌందర్య ఉత్పత్తులు, వ్యక్తిగత సంరక్షణ విభాగాదాయం 2.5% పెరిగి రూ.5125 కోట్లకు చేరుకుంది.
• ఆహార-రిఫ్రెష్‌మెంట్‌ విభాగ ఆదాయం 3% హెచ్చి రూ.3,910 కోట్లుగా ఉంది.
• ఇతర విభాగాల ఆదాయం (ఎగుమతులు, కన్‌సైన్‌మెంట్‌ సహా) 11.6% తగ్గి రూ.466 కోట్లకు పరిమితమైంది.

పూర్తి ఆర్థిక సంవత్సరానికి: 2023-24 పూర్తి ఆర్థిక సంవత్సరానికి నికర లాభం రూ.10,282 కోట్లుగా నమోదైంది. 2022-23 ఆర్థిక సంవత్సర లాభం రూ.10,143 కోట్లతో పోలిస్తే ఇది కాస్త ఎక్కువ. ఇదే సమయంలో ఆదాయం రూ.61,092 కోట్ల నుంచి రూ.62,707 కోట్లకు పెరిగింది. కంపెనీ 2023-24లో మెరుగైన పనితీరును కనబరచిందని ఫలితాల సందర్భంగా కంపెనీ సీఈఓ, ఎండీ రోహిత్‌ జావా పేర్కొన్నారు.

తుది డివిడెండు రూ.24: తుది డివిడెండు రూ.24ను హెచ్‌యూఎల్‌ బోర్డు ప్రతిపాదించింది. దీనికి వాటాదార్ల అనుమతి లభించాల్సి ఉంది. రూ.18 మధ్యంతర డివిడెండుతో కలిపి మొత్తం డివిడెండు 2023-24 ఆర్థిక సంవత్సరానికి రూ.42కు చేరుతుంది. 2022-23తో పోలిస్తే ఇది 8% ఎక్కువ.

బీఎస్‌ఈలో బుధవారం కంపెనీ షేరు 0.16% తగ్గి రూ.2259.15 వద్ద స్థిరపడింది.