రికార్డు గరిష్ఠాలకు వెండి

ఈనాడు వాణిజ్య విభాగం: బంగారం, వెండి ధరలు గత రెండు రోజుల్లో బాగా పెరిగాయి. వెండి అయితే కిలో ధర తొలిసారిగా రూ.88,000ను మించింది. గత రెండు రోజుల్లోనే కిలోకు రూ.1500కు పైగా పెరిగింది. గురువారం రాత్రి 11 గంటల సమయానికి హైదరాబాద్‌ బులియన్‌ విపణిలో కిలో వెండి ధర రూ.88,700గా ఉంది. మేలిమి (24 క్యారెట్ల) బంగారం ధర కూడా రెండు రోజుల్లో 10 గ్రాములకు రూ.1000 పెరిగి రూ.75,600కి చేరింది. ఇప్పటివరకు మేలిమి బంగారం 10 గ్రాముల గరిష్ఠ ధర రూ.76,800గా ఉంది. అంతర్జాతీయంగా డాలర్‌కు గిరాకీ పరిమితమైన నేపథ్యంలో, ఈ లోహాలపైకి పెట్టుబడులు మళ్లడమే ధరల పెరుగుదలకు కారణమని బులియన్‌ వర్గాలు చెబుతున్నాయి. పారిశ్రామికంగా వెండి వినియోగం అధికమవుతున్న తరుణంలో, ఈ లోహ ధరలు పెరగనున్నాయని ఇటీవల విశ్లేషణలు వస్తున్న సంగతి విదితమే.