రూ.7,675 కోట్లకు పెరిగిన వొడాఫోన్‌ ఐడియా నష్టం

దిల్లీ: వొడాఫోన్‌ ఐడియా, మార్చి త్రైమాసికంలో రూ.7,675 కోట్ల నష్టాన్ని నమోదు చేసింది. 2022-23  ఇదే త్రైమాసికంలో కంపెనీ రూ.6,419 కోట్ల నష్టాన్ని చవిచూసింది. వడ్డీ, ఆర్థిక వ్యయాలు పెరగడం వల్లే, నష్టాలు మరింత అధికమయ్యాయని కంపెనీ తెలిపింది. మొత్తం కార్యకలాపాల ఆదాయం స్తబ్దుగా రూ.10,607 కోట్లుగా నమోదైంది. పూర్తి ఆర్థిక సంవత్సరం (2023-24)లో కంపెనీ రూ.31,238.4 కోట్ల నష్టాన్ని నమోదుచేసింది. 2022-23లో ఇది రూ.29,301.1 కోట్లుగా ఉంది.

వార్షిక కార్యకలాపాల ఆదాయం రూ.42,177.2 కోట్ల నుంచి 1.1% పెరిగి రూ.42,651.7 కోట్లకు చేరింది. ‘వరుసగా 11 త్రైమాసికాల పాటు వినియోగదారు సగటు ఆదాయం (ఆర్పు), 4జీ చందాదారుల్లో వృద్ధి నమోదైంది. ఏడాది క్రితంతో పోలిస్తే, మార్చి ఆఖరుకు ఆర్పు 7.6% పెరిగి రూ.146గా నమోదైంది. రూ.21,500 కోట్ల ఈక్విటీ నిధుల సమీకరణతో 4జీ కవరేజీ పెంచడంతో పాటు 5జీ సేవలను ప్రారంభించనున్నాం. విస్తరణ ప్రణాళికలకు అవసరమైన నిధుల కోసం రుణదాతలతో చర్చిస్తున్నాం’ అని వొడాఫోన్‌ ఐడియా సీఈఓ అక్షయ మూంద్రా తెలిపారు.