ఓఎన్‌జీసీ లాభం రూ.9,869 కోట్లు

దిల్లీ: ప్రభుత్వరంగ ఓఎన్‌జీసీ (ఆయిల్‌ అండ్‌ నాచురల్‌ గ్యాస్‌ కార్పొరేషన్‌) జనవరి- మార్చి త్రైమాసికంలో రూ.9,869 కోట్ల నికరలాభాన్ని ఆర్జించింది. 2022-23 ఇదే త్రైమాసిక నికర లాభం రూ.528 కోట్లతో పోలిస్తే ఇది 19 రెట్లు అధికం. ఏడాది క్రితం పన్ను వివాదాల కింద రూ.9,235 కోట్లు కేటాయించాల్సి రావడంతో, లాభం తక్కువగా నమోదైంది. ఆ కేటాయింపులను మినహాయిస్తే, సమీక్షా త్రైమాసికంలో లాభం స్వల్పంగానే పెరిగినట్లు భావించాలి. సమీక్షిస్తున్న త్రైమాసికంలో ముడి చమురు ఉత్పత్తి 4.3% పెరిగి 4.71 మిలియన్‌ టన్నులుగా నమోదైంది. ప్రతి బ్యారెల్‌ ముడి చమురుపై 80.81 డాలర్లను సంస్థ ఆర్జించింది. ఏడాది క్రితం ఈ మొత్తం 77.12 డాలర్లే. ఇదే సమయంలో గ్యాస్‌ ధర ఒక్కో బ్రిటీష్‌ థర్మల్‌ యూనిట్‌కు   8.57 డాలర్ల నుంచి 6.50 డాలర్లకు తగ్గింది. గ్యాస్‌ ఉత్పత్తి కూడా 2.4% తగ్గి 4.95 బిలియన్‌ క్యూబిక్‌ మీటర్లకు (బీసీఎం) పరిమితమైంది. కార్యకలాపాల   ఆదాయం  4.6% తగ్గి రూ.34,637 కోట్లుగా నమోదైంది.

2023-24కు రికార్డు లాభం: పూర్తి ఆర్థిక సంవత్సరానికి ఓఎన్‌జీసీ స్టాండలోన్‌ నికర లాభం రూ.40,526 కోట్లకు పెరిగింది. ఇది సంస్థ చరిత్రలోనే అత్యధికం. 2022-23లో ఇది రూ.40,097 కోట్లుగా ఉంది. ఇదే సమయంలో ఆదాయం రూ.1.55 లక్షల కోట్ల నుంచి రూ.1.38 లక్షల కోట్లకు తగ్గింది. ఏకీకృత ప్రాతిపదికన ఓఎన్‌జీసీ నికర లాభం రూ.57,101 కోట్లుగా నమోదైంది. చమురు ఉత్పత్తి 0.7% తగ్గి 18.4 మిలియన్‌ టన్నులకు; గ్యాస్‌ ఉత్పత్తి 3.2 శాతం తగ్గి 19.97 బీసీఎంకు పరిమితమైంది. 

• రూ.5 ముఖ విలువ గల ఒక్కో షేరుకు 50% (2.50) తుది డివిడెండును డైరెక్టర్ల బోర్డు సిఫారసు చేసింది. ఇప్పటికే చెల్లించిన 195% మధ్యంతర డివిడెండుతో కలిపితే, గత ఆర్థిక సంవత్సరానికి మొత్తంగా 245% (రూ.12.25) డివిడెండును ఓఎన్‌జీసీ ప్రకటించినట్లు అవుతుంది. ఇందుకోసం మొత్తంగా రూ.15,411 కోట్లు వెచ్చిస్తోంది.
• 2023-24 ఆర్థిక సంవత్సరంలో ఓఎన్‌జీసీ రూ.37,000 కోట్ల మూలధన వ్యయాలు చేసింది. 2022-23లో ఇది రూ.30,208 కోట్లుగా ఉంది. 
• విదేశీ అనుబంధ సంస్థ ఓఎన్‌జీసీ విదేశ్‌ లిమిటెడ్‌ (ఓవీఎల్‌) 203-24లో 7.178 మిలియన్‌ టన్నుల ముడి చమురును, 3.34 బీసీఎం గ్యాస్‌ను ఉత్పత్తి చేసింది. 2022-23లో ముడి చమురు ఉత్పత్తి 6.349 మిలియన్‌ టన్నులు కాగా.. గ్యాస్‌ ఉత్పత్తి 3.822 బీసీఎంగా నమోదైంది. 2023-24లో ఓవీఎల్‌ నికర లాభం రూ.639 కోట్లకు తగ్గింది. 2022-23లో ఇది రూ.1,660 కోట్లుగా ఉంది. టర్నోవరు 18.2% తగ్గి రూ.9,553 కోట్లకు పరిమితమైంది.