ఆర్‌బీఐ మిగులు నిధుల బదిలీపై నేడు నిర్ణయం

ఖజానాకు రూ.75,000-1,20,000 కోట్లు!

దిల్లీ: రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) కేంద్ర బోర్డు డైరెక్టర్లు బుధవారం సమావేశమై, మిగులు నిధులను ప్రభుత్వానికి బదిలీపై చేసే విషయమై నిర్ణయం తీసుకునే అవకాశం ఉందని ప్రభుత్వ ఉన్నతాధికారి ఒకరు వెల్లడించారు. 2023-24 ఆర్థిక సంవత్సరానికి ఆర్‌బీఐ రూ.75,000-1,20,000 కోట్ల మేర మిగులు నిధులను బదిలీ చేయొచ్చని ఆర్థికవేత్తలు అంచనా వేస్తున్నారు. 2022-23 ఆర్థిక సంవత్సరంలో ఆర్‌బీఐ రూ.87,416 కోట్ల మిగులు నిధులను ప్రభుత్వానికి బదిలీ చేసింది. 2024-25 ఆర్థిక సంవత్సర తాత్కాలిక బడ్జెట్‌లో ఆర్‌బీఐ, ప్రభుత్వ రంగ బ్యాంకుల డివిడెండ్ల రూపంలో ఖజానాకు రూ.1.02 లక్షల కోట్లు సమకూరుతాయని ప్రభుత్వం అంచనా వేసింది. 2023-24లో సవరించిన అంచనా రూ.1.04 లక్షల కోట్ల కంటే ఇది తక్కువే. ఈ సమావేశంలో ఆర్‌బీఐ కేంద్ర బోర్డు వార్షిక నివేదికతో పాటు 2023-24 ఖాతాలను ఆమోదించే అవకాశం కూడా ఉంది. కంటిన్‌జెన్సీ రిస్క్‌ బఫర్‌ లెవల్‌ను కూడా నిర్ణయించొచ్చని తెలుస్తోంది. ప్రస్తుత ఖాతాల ప్రకారం ఇది 6 శాతంగా ఉంది.