ప్రయాణ, పర్యాటక సూచీలో భారత్‌కు 39వ స్థానం: డబ్ల్యూఈఎఫ్‌

దిల్లీ: ప్రపంచ ఆర్థిక వేదిక (డబ్ల్యూఈఎఫ్‌) ప్రయాణ, పర్యాటక అభివృద్ధి సూచీ 2024లో భారత్‌ ర్యాంక్‌ మెరుగై 39వ స్థానానికి చేరింది. అంతర్జాతీయ పర్యాటక కార్యకలాపాలు కొవిడ్‌ ముందు స్థాయికి చేరాయని డబ్ల్యూఈఎఫ్‌ వార్షిక నివేదిక వెల్లడించింది. ఈ జాబితాలో అమెరికా తొలి స్థానంలో నిలిచింది. దక్షిణసియాలో తక్కువ మధ్య స్థాయి ఆదాయం కలిగిన దేశాల్లో భారత్‌ తొలి స్థానంలో ఉంది. 2021లో    డబ్ల్యూఈఎఫ్‌ ప్రకటించిన ఈ సూచీలో మన దేశ స్థానం 54 కాగా, ఈసారి మెరుగు పడింది. 2024 జాబితాలో అమెరికా తర్వాత స్థానాల్లో స్పెయిన్, జపాన్, ఫ్రాన్స్, ఆస్ట్రేలియా నిలిచాయి. యూనివర్సిటీ ఆఫ్‌ సర్వేతో కలిసి ఈ సూచీని రూపొందించారు. సూచీలో పారామితుల ప్రకారం వ్యయాల పరంగా మన దేశానికి 18వ ర్యాంక్, విమాన రవాణాలో 26వ స్థానం, రోడ్లు-నౌకాశ్రయాల మౌలిక వసతుల్లో 25వ స్థానం లభించింది. భారత్‌లో సహజ (6వ ర్యాంక్‌), సాంస్కృతిక (9వ), విరామేతర (9వ) వనరులు ప్రయాణాలకు సాయం చేస్తున్నాయని డబ్ల్యూఈఎఫ్‌ పేర్కొంది.

• దేశ మొత్తం టీటీడీఐ (ట్రావెల్‌ అండ్‌ టూరిజం డెవలప్‌మెంట్‌ ఇండెక్స్‌) స్కోరు 2.1 శాతంగా ఉంది. ఇది 2019 స్థాయి కంటే తక్కువ. అధిక ఆదాయ ఆర్థిక వ్యవస్థలు కలిగిన ఐరోపా, ఆసియా-పసిఫిక్‌ దేశాలు ఈ జాబితాలో ముందు వరుసలో ఉన్నాయి. ఈ ఏడాది అంతర్జాతీయ జీడీపీకి.. విదేశీ పర్యాటకుల ప్రయాణ-పర్యాటక రంగాల వాటా కొవిడ్‌ ముందు స్థాయికి చేరొచ్చని డబ్ల్యూఈఎఫ్‌ వివరించింది. అంతర్జాతీయ పర్యాటకుల రికవరీలో పశ్చిమాసియా దేశాలు 20% (2019 స్థాయి కంటే ఎక్కువ) నమోదు చేశాయి. ఐరోపా, ఆఫ్రికా, అమెరికాలు 2023లో బలమైన రికవరీ (90%) సాధించాయి. 119 దేశాల్లో ప్రయాణ, పర్యాటక రంగాలను విశ్లేషించి ఈ నివేదికను రూపొందించారు.
• జర్మనీ (6), యూకే (7), చైనా (8), ఇటలీ (9), స్విట్జర్లాండ్‌ (10) టాప్‌-10 జాబితాలో చోటు దక్కించుకున్నాయి. అధిక ఆదాయం కలిగిన ఆర్థిక వ్యవస్థలు సాధారణంగానే ప్రయాణ, పర్యాటక అభివృద్ధికి అనుకూల పరిస్థితులను కలిగి ఉంటాయని నివేదిక పేర్కొంది.