కోరమాండల్‌ ఇంటర్నేషనల్‌ నుంచి కొత్తగా 10 పంట సంరక్షణ ఉత్పత్తులు

ఈనాడు, హైదరాబాద్‌: కోరమాండల్‌ ఇంటర్నేషనల్‌ కొత్తగా 10 పంట సంరక్షణ ఉత్పత్తులు విడుదల చేసింది. ఇందులో పేటెంట్‌ కలిగిన ఉత్పత్తులు 3,  వేప పూతతో కూడిన బయో ప్లాంట్, నేల ఆరోగ్యాన్ని పెంపొందించే ఉత్పత్తి, 5 జనరిక్‌ ఫార్ములేషన్లు (వీటిలో 3 హెర్బిసైడ్లు) ఉన్నాయి. కాండం తొలిచే పురుగు, ఆకు ముడత.. తదితర తెగుళ్ల నుంచి వరి పంటను రక్షించడానికి జపాన్‌ సాంకేతిక పరిజ్ఞానంతో ‘ప్రచండ్‌’ అనే ఉత్పత్తి ఇందులో ఉంది. ఇది పంట నష్టాన్ని 70% వరకు తగ్గిస్తుందని కంపెనీ పేర్కొంది. మొక్కజొన్న పంటను నాశనం చేసే కత్తెర పురుగును ఎదుర్కోడానికి ప్రత్యేక ఫార్ములాతో సస్య రక్షణ ఉత్పత్తిని తీసుకువచ్చినట్లు కంపెనీ వివరించింది. 2023-24లో సంస్థ ఆదాయాల్లో కొత్త ఉత్పత్తుల వాటా 15% కాగా, ప్రస్తుత ఆర్థిక సంవత్సర ఆదాయాల్లో కొత్త ఉత్పత్తుల వాటా ఇంకా పెరుగుతుందని సంస్థ ఎగ్జిక్యూటివ్‌ డైరెక్టర్‌ (బయో ఉత్పత్తులు, రిటైల్‌) డాక్టర్‌ రఘురామ్‌ దేవరకొండ పేర్కొన్నారు.