వయాకామ్‌ 18, స్టార్‌ ఇండియాల విలీనం!

రూ.70,550 కోట్ల విలీన ప్రతిపాదన
సీసీఐ ఆమోదం కోరిన రిలయన్స్‌ ఇండస్ట్రీస్‌

దిల్లీ: వయాకామ్‌ 18 - స్టార్‌ ఇండియా ప్రై.లి. (ఎస్‌ఐపీఎల్‌)ల విలీనానికి రిలయన్స్‌ ఇండస్ట్రీస్‌ కాంపిటీషన్‌ కమిషన్‌ ఆఫ్‌ ఇండియా (సీసీఐ) అనుమతి కోరింది. ఈ ప్రతిపాదిత లావాదేవీతో మీడియా వ్యాపారాలను విలీనం చేయబోతోంది. ఆర్‌ఐఎల్‌కు చెందిన వయాకామ్‌ 18, ద వాల్ట్‌ డిస్నీ కంపెనీ (టీడబ్ల్యూడీసీ) యాజమాన్యంలోని ఎస్‌ఐపీఎల్‌లు విలీనం కాబోతున్నాయి. ఈ లావాదేవీ విలువ 8.5 బిలియన్‌ డాలర్లు (సుమారు రూ.70,550 కోట్లు). ఈ విలీన లావాదేవీ వల్ల దేశంలోని మీడియా వ్యాపారాల్లో పోటీ వాతావరణానికి ఎలాంటి ఇబ్బందీ ఉండబోదని సీసీఐకి ఆర్‌ఐఎల్‌ తెలిపింది.

దేశంలో ఎస్‌ఐపీఎల్‌ సంస్థ పలు టీవీ ఛానళ్లతోపాటు ఓటీటీ ప్లామ్‌ఫామ్‌ డిస్నీ+హాట్‌స్టార్‌ను నిర్వహిస్తోంది. వయాకామ్‌ 18 కూడా బ్రాడ్‌కాస్టింగ్‌ టీవీ ఛానళ్లతో పాటు ఓటీటీ ప్లాట్‌ఫామ్‌ జియో సినిమాను నడుపుతోంది. దీంతో పాటు ప్రొడక్షన్, మోషన్‌ పిక్చర్స్‌ పంపిణీ రంగంలోనూ ఉంది. ఇరు సంస్థలను కలిపి సంయుక్త సంస్థ(జేవీ)ను ఏర్పాటు చేయాలని ఈ ఏడాది ఫిబ్రవరిలో రిలయన్స్, వాల్ట్‌ డిస్నీ ఒప్పందం చేసుకున్నాయి. ఇది పూర్తయితే వివిధ భాషల్లో వందకు పైగా ఛానళ్లు, 2 ఓటీటీలు విలీన సంస్థ చేతిలో ఉంటాయి. ఈ జేవీకి నీతా అంబానీ ఛైర్‌పర్సన్‌గా వ్యవహరిస్తారు. ఈ సంయుక్త సంస్థలో 63.13 శాతం వాటా రిలయన్స్‌కు, 36.84 శాతం వాటా వాల్ట్‌ డిస్నీకి ఉంటుంది. విలీనం అనంతరం ఓటీటీ వ్యాపార అభివృద్ధికి ఆర్‌ఐఎల్‌ రూ.11,500 కోట్ల పెట్టుబడి పెట్టనుంది.