మార్చి త్రైమాసిక వృద్ధి 6.1-6.7 శాతం!

ఆర్థిక వేత్తల అంచనా 

దిల్లీ: దేశ జీడీపీ వృద్ధి 2023-24 నాలుగో త్రైమాసికంలో 6.1-6.7 శాతంగా నమోదు కావొచ్చని ఆర్థికవేత్తలు అంచనా వేస్తున్నారు. గత ఆర్థిక సంవత్సర తొలి 3 త్రైమాసికాల్లో (ఏప్రిల్‌-జూన్, జులై-సెప్టెంబరు, అక్టోబరు-డిసెంబరు) జీడీపీ వృద్ధి 8 శాతానికి పైగా నమోదైన సంగతి విదితమే. ఈ నెల 31న మార్చి త్రైమాసిక, పూర్తి ఆర్థిక సంవత్సరానికి జీడీపీ అధికారిక గణాంకాలను ప్రభుత్వం విడుదల చేయనుంది. పూర్తి ఆర్థిక సంవత్సరానికి జీడీపీ వృద్ధి 7.6-7.8 శాతం మధ్య నమోదు కావొచ్చని ఆర్థికవేత్తలు అంచనా వేస్తున్నారు.

త్రైమాసికం వృద్ధి (%)

ఏప్రిల్‌-జూన్‌ 8.2
జులై-సెప్టెంబరు 8.1
అక్టోబరు-డిసెంబరు 8.4
జనవరి-మార్చి 6.1-6.7 (అంచనా)

• ‘జనవరి-మార్చిలో తయారీ కార్యకలాపాలు, నిర్మాణ సంబంధిత, పెట్టుబడుల విభాగాలు మంచి పని తీరు కనబరిచాయి. అయితే వ్యవసాయ రంగం వెనక్కి లాగింది. దీంతో జీడీపీ వృద్ధి మార్చి త్రైమాసికంలో 6.1 శాతంగా నమోదు కావొచ్చు. పూర్తి ఆర్థిక సంవత్సరానికి 7.6% వృద్ధి నమోదు కావొచ్చ’ని కోటక్‌ మహీంద్రా బ్యాంక్‌ ముఖ్య ఆర్థిక వేత్త ఉపాసన భరద్వాజ్‌ అంచనా వేశారు.
• 2024-25లో దేశ వృద్ధిరేటు సుమారు 7 శాతం కావొచ్చని ఈవై ఇండియా ముఖ్య విధాన సలహాదారు డీకే శ్రీవాత్సవ అంచనా వేశారు. 2023-24 నాలుగో త్రైమాసికంలో 6.5%, పూర్తి ఆర్థిక సంవత్సరంలో ఐఎంఎఫ్‌ అంచనా వేసిన 7.8 శాతం వృద్ధిని అధిగమించొచ్చని పేర్కొన్నారు.
• ఇండియా రేటింగ్స్‌ అండ్‌ రీసెర్చ్‌ మార్చి త్రైమాసికంలో 6.2% వృద్ధిని అంచనా వేసింది. దేశీయ రేటింగ్‌ ఏజెన్సీ ఇక్రా 6.7 శాతంగా అంచనా వేసింది. పూర్తి ఆర్థిక సంవత్సరానికి 7.8% వృద్ధి నమోదయ్యే అవకాశం ఉందని తెలిపింది. ఏప్రిల్‌లో ద్రవ్య పరపతి విధాన సమీక్ష సందర్భంగా రిజర్వ్‌ బ్యాంక్‌ ఇఫ్‌ ఇండియా (ఆర్‌బీఐ) 2023-24 పూర్తి ఆర్థిక సంవత్సరానికి వృద్ధి రేటును 7 శాతంగా అంచనా వేసిన సంగతి తెలిసిందే.
• 2022-23 ఆర్థిక సంవత్సరం మార్చి త్రైమాసికంలో జీడీపీ వృద్ధి 6.1 శాతంగా నమోదైంది.  2022-23 పూర్తి ఆర్థిక సంవత్సరానికి వృద్ధి 7 శాతంగా నమోదైన సంగతి తెలిసిందే.