సాధారణ బీమా ప్రీమియం రూ.3.7 లక్షల కోట్లకు: ఇక్రా

దిల్లీ: సాధారణ బీమా పరిశ్రమ స్థూల ప్రత్యక్ష ప్రీమియం ఆదాయం (జీడీపీఐ) 2025-26 నాటికి 32% వృద్ధితో రూ.3.7 లక్షల కోట్లకు చేరొచ్చని ఇక్రా అంచనా వేసింది. 2023-24లో ఇది రూ.2.8 లక్షల కోట్లుగా నమోదైందని తెలిపింది. ప్రీమియం వసూళ్లలో ప్రైవేటు బీమా సంస్థలు బలంగా వృద్ధి నమోదు చేయనుండగా, ప్రభుత్వరంగ బీమా సంస్థల వృద్ధి మధ్యస్థంగా నమోదు కావొచ్చని పేర్కొంది. వాటి మూలధన స్థితి బలహీనంగా ఉండటమే ఇందుకు కారణమని వివరించింది. ప్రైవేటు బీమా సంస్థల లాభదాయకత కూడా మెరుగవుతుందని వెల్లడించింది. పీఎస్‌యూ బీమా సంస్థల నికర లాభదాయకత తగ్గొచ్చని తెలిపింది.