అంకురాల కోసం ఐఓబీ ప్రత్యేక శాఖ

చెన్నై: ప్రభుత్వ రంగ ఇండియన్‌ ఓవర్సీస్‌ బ్యాంక్‌ (ఐఓబీ) అంకుర సంస్థలు, ఔత్సాహిక పారిశ్రామిక వేత్తల కోసం చెన్నైలో ప్రత్యేకంగా ఒక శాఖను ఏర్పాటు చేసింది. దేశ వ్యాప్తంగా ఇలాంటి మరో 5 శాఖలను ఏర్పాటు చేయాలనుకుంటున్నట్లు తెలిపింది. ‘ఐఓబీ స్టార్టప్‌ కరెంట్‌ ఖాతా’తో పాటు రుణ పథకమైన ‘ఐఓబీ ప్రగతి’ని ఈ శాఖలో ప్రారంభించింది. ‘మన ఆర్థిక వ్యవస్థలో వినూత్నత, ఉద్యోగాల సృష్టికి అంకురాలు మూలస్తంభాలు. ఈ ప్రత్యేక శాఖ ద్వారా, అంకుర సంస్థలు ఎదుర్కొంటున్న ఆర్థిక అవరోధాలను అధిగమించేలా చేస్తామ’ని ఐఓబీ ఎండీ, సీఈఓ అజయ్‌ కుమార్‌ శ్రీవాస్తవ తెలిపారు. అంకురాల వ్యవస్థ వృద్ధి చెందేందుకు తమవంతు మద్దతు ఇస్తామని ఆయన పేర్కొన్నారు.