నాలుగేళ్లలో రూ.1300 కోట్ల టర్నోవర్‌!

ఎస్‌ఎంఎస్‌ ఫార్మా లక్ష్యం 
రూ.150 కోట్ల మూలధన పెట్టుబడికి సన్నాహాలు 

ఈనాడు, హైదరాబాద్‌: హైదరాబాద్‌ కేంద్రంగా కార్యకలాపాలు సాగిస్తున్న ఔషధ సంస్థ, ఎస్‌ఎంఎస్‌ ఫార్మాస్యూటికల్స్‌ వచ్చే మూడు - నాలుగేళ్లలో తన టర్నోవర్‌ను రూ.1300 కోట్లకు పెంచుకోవాలని లక్ష్యంగా పెట్టుకుంది. దీంతో పాటు 20% ఎబిటా (వడ్డీ, పన్ను, తరుగుదల, ఇతర కేటాయింపుల కంటే ముందు ఆదాయం) సాధించాలని భావిస్తోంది. దీనికి తగ్గట్లుగా తన తయారీ యూనిట్లను విస్తరించడం, ఉత్పత్తి సామర్థ్యాన్ని పెంచుకోవడానికి రూ.150 కోట్ల మూలధన పెట్టుబడిని సమీకరిస్తోంది. ఈ నిధుల్లో కొంత సొంతంగా సమకూర్చుకోవడంతో పాటు, మరికొంత సొమ్మును టర్మ్‌ రుణాల రూపంలో సేకరిస్తారు. ఆర్థిక ఫలితాలపై మదుపరులతో నిర్వహించిన టెలికాన్ఫెరెన్స్‌ కాల్‌లో ఈ విషయాలను ఎస్‌ఎంఎస్‌ ఫార్మా ఎగ్జిక్యూటివ్‌ డైరెక్టర్‌ వంశీ కృష్ణ వెల్లడించారు.

ఆదుకున్న ఐబూప్రూఫెన్‌: గత ఆర్థిక సంవత్సరానికి ఈ సంస్థ రూ.709 కోట్ల ఆదాయంపై రూ.50 కోట్ల నికరలాభాన్ని ఆర్జించింది. 2022-23లో రూ.522 కోట్ల ఆదాయంపై రూ.7 కోట్ల నష్టాన్ని మూటగట్టుకుంది. గత ఆర్థిక సంవత్సరంలో మంచి ఫలితాలు నమోదు చేయడానికి ఐబూప్రూఫెన్‌తో పాటు డయాబెటిక్‌ ఔషధాలు దోహదపడినట్లు ఎస్‌ఎంఎస్‌ ఫార్మా వివరించింది. గత ఆర్థిక సంవత్సర టర్నోవర్‌లో 19% ఆదాయం ఐబూప్రూఫెన్‌ నుంచే లభించినట్లు సంస్థ తెలిపింది.

• ఇదే సానుకూలత ప్రస్తుత ఆర్థిక సంవత్సరంలోనూ కొనసాగగలదని సంస్థ యాజమాన్యం ఆశిస్తోంది. ఐబూప్రూఫెన్‌ అమ్మకాల్లో 25-28% వృద్ధి నమోదు కావచ్చని అంచనా వేస్తోంది. డయాబెటిక్‌ ఔషధాల అమ్మకాలూ పెరుగుతాయని అంచనా వేస్తోంది. దీనివల్ల ప్రస్తుత ఆర్థిక సంవత్సర (2024-25) ఆదాయాల్లో 20-25% వృద్ధి ఉంటుందని, అదే సమయంలో 20% ఎబిటా నమోదు కావచ్చని పేర్కొంది. గత ఆర్థిక సంవత్సరంలో ఎబిటా 16 శాతమే. ఐబూప్రూఫెన్‌ ఔషధ ధరలు ఇటీవల తగ్గాయి. అయినా, ఇతర సంస్థలతో పోటీపడి తమ మార్కెట్‌ వాటా నిలబెట్టుకోగలుగుతున్నట్లు ఎస్‌ఎంఎస్‌ ఫార్మా వివరించింది. ప్రస్తుతం ఈ ఔషధం ధరలు స్థిరంగా ఉన్నట్లు వెల్లడించింది.