స్మార్ట్‌ టీవీల సరఫరాలు తగ్గాయ్‌

జనవరి-మార్చిపై కౌంటర్‌పాయింట్‌ రీసెర్చ్‌ నివేదిక 

దిల్లీ: కంపెనీల నుంచి స్మార్ట్‌ టీవీల సరఫరాలు, గతేడాది ఇదే సమయంతో పోలిస్తే, ఈ ఏడాది జనవరి-మార్చిలో 14% తగ్గాయని కౌంటర్‌పాయింట్‌ రీసెర్చ్‌ నివేదిక  వెల్లడించింది. వినియోగదారు గిరాకీ స్తబ్దుగా ఉండటంతో పాటు.. ఇప్పటికే డీలర్ల వద్ద నిల్వలు అధికంగా ఉండటమే ఇందుకు కారణమని పేర్కొంది. ఈ క్యాలెండర్‌ ఏడాదిలో టీవీల సరఫరాల్లో 10% క్షీణత నమోదయ్యే అవకాశం ఉందని అంచనా వేసింది. సమీక్షా త్రైమాసికంలో చైనా కంపెనీ షియోమీని తోసిరాజని, శామ్‌సంగ్‌ మళ్లీ అగ్ర స్థానానికి చేరింది. చైనా బ్రాండ్ల స్మార్ట్‌ టీవీల సరఫరాలు 30% క్షీణించడం గమనార్హం. వన్‌ప్లస్, హైయర్, రియల్‌మీ బ్రాండ్ల స్మార్ట్‌ టీవీలు బాగా తగ్గాయని నివేదిక తెలిపింది. శామ్‌సంగ్‌ సరఫరాలు 40% పెరిగాయి. భారతీయ కంపెనీల స్మార్ట్‌ టీవీల సరఫరాలు 16 శాతంగా ఉన్నాయి. దక్షిణ కొరియా కంపెనీ ఎల్‌జీ సరఫరాలు 43% పెరిగాయి. మన దేశంలో స్మార్ట్‌ టీవీ విపణిలో ఎల్‌జీకి 15% మార్కెట్‌ వాటా ఉంది. చైనా బ్రాండ్లు ఎంఐ, టీసీఎల్‌ కంపెనీల సరఫరాలు వరుసగా 2%, 4% క్షీణత నమోదు చేశాయి. మన విపణిలో వీటి వాటా వరుసగా 12%, 7 శాతంగా ఉంది. సోనీ కంపెనీ సరఫరాలు 19% వృద్ధిని నమోదు చేయగా, దేశీయంగా ఈ కంపెనీకి 7% వాటా ఉంది. ‘దిగ్గజ, అందరికీ తెలిసిన బ్రాండ్లకు వినియోగదార్లు ప్రాధాన్యం ఇస్తున్నారు. శామ్‌సంగ్, ఎల్‌జీ, షియోమీ బ్రాండ్ల స్మార్ట్‌ టీవీలకు గిరాకీ బాగుంది. టాప్‌-5 కంపెనీల వాటా 2024 తొలి త్రైమాసికంలో 57 శాతానికి చేరింది. 2023 ఇదే సమయంలో ఇది 41 శాతంగానే నమోదైంద’ని రీసెర్చ్‌ అనలిస్ట్‌ ఆకాశ్‌ జత్వాలా వెల్లడించారు. మధ్య స్థాయి (మిడ్‌-టైర్‌) కంపెనీల్లో హైసెన్స్, పానసోనిక్, వెస్టెల్, తోషిబా, మోటోరోలా వంటివి వృద్ధి నమోదు చేశాయని, ఇవి క్యూఎల్‌ఈడీ టీవీలను 4కే రెజొల్యూషన్‌తో, మెరుగైన దృశ్య అనుభూతితో తక్కువ ధరకే అందిస్తున్నాయని పేర్కొన్నారు.