‘మేడ ఇన్‌స్టిట్యూట్‌ ఆఫ్‌ పొడియాట్రీ’లో కిమ్స్‌ హాస్పిటల్స్‌కు 51% వాటా

ఈనాడు, హైదరాబాద్‌: వాస్క్యులర్‌ సర్జరీలో దశాబ్దకాలానికి పైగా అనుభవం ఉన్న డాక్టర్‌ మేడ ఇటీవల నెలకొల్పిన మేడ ఇన్‌స్టిట్యూట్‌ ఆఫ్‌ పొడియాట్రీ ప్రైవేట్‌ లిమిటెడ్‌ అనే వైద్య సేవల సంస్థలో 51% వాటాను కిమ్స్‌ హాస్పిటల్స్‌ (కృష్ణ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌) సొంతం చేసుకుంది. ఈ సంస్థలో రూ.1.02 కోట్లు పెట్టుబడి పెట్టి, ఒక్కొక్కటీ రూ.10 ముఖ విలువ గల 10.20 లక్షల ఈక్విటీ షేర్లను కొనుగోలు చేసినట్లు కిమ్స్‌ హాస్పిటల్స్‌ మంగళవారం స్టాక్‌ ఎక్స్ఛేంజీలకు తెలియజేసింది. మేడ ఇన్‌స్టిట్యూట్‌ ఆఫ్‌ పొడియాట్రీ 9 పడకలతో ఒక ఆసుపత్రిని త్వరలో ప్రారంభించే యత్నాల్లో ఉంది. తదుపరి దీన్ని 20 పడకలకు విస్తరిస్తారు. ఈ సంస్థలో పెట్టుబడి పెట్టడం ద్వారా హైదరాబాద్‌లో నాణ్యమైన పొడియాట్రీ కేర్‌ (పాదాలకు పగుళ్లు, వాపులు రావటం..సంబంధిత ఇతర ఇబ్బందులకు చికిత్స) ను అందుబాటులోకి తీసుకువచ్చే అవకాశం ఏర్పడుతున్నట్లు కిమ్స్‌ హాస్పిటల్స్‌ వివరించింది.