రూ.7.7 కోట్లు సమీకరించిన వీహౌస్‌

ఈనాడు, హైదరాబాద్‌: ఇంటి నిర్మాణంలో అవసరమైన అన్ని రకాల సేవలనూ అందించే టెక్‌ ఆధారిత నిర్మాణ అగ్రిగేటర్‌ వీహౌస్‌ (గతంలో హోకోమోకో) రూ.7.7 కోట్ల (1 మిలియన్‌ డాలర్లు) నిధులను సమీకరించింది. సిరీస్‌ ఎ ఫండింగ్‌లో భాగంగా ఈ మొత్తం ఆంథిల్‌ వెంచర్స్‌ నుంచి అందుకున్నట్లు సంస్థ వ్యవస్థాపకుడు, సీఈఓ శ్రీపాద్‌ నందిరాజ్‌ తెలిపారు. హైదరాబాద్‌కు చెందిన ఈ సంస్థ ఇంటి నిర్మాణదారులకు అవసరమైన అనుమతులు, ఆర్కిటెక్చర్‌, ఇంటీరియర్స్‌తో పాటు, పర్యవేక్షణ సేవలను అందిస్తుంది. ఇంటి నిర్మాణ పనులు, నిర్మాణ సామగ్రి వినియోగంలాంటివి వీడియోలు, ఫొటోల ద్వారా పర్యవేక్షించే ఏర్పాటు చేస్తుంది. సంస్థను సాంకేతికంగా మరింత మెరుగుపర్చేందుకు, విస్తరణ కోసం ఈ నిధులను వినియోగిస్తామని తెలిపారు.