Gold Rate: కొత్త గరిష్ఠాలకు పసిడి

హైదరాబాద్‌: పసిడి ధరల జోరు కొనసాగుతోంది. బుధవారం రాత్రి 11.30కు స్థానిక మార్కెట్లో 10 గ్రాముల స్వచ్ఛమైన బంగారం(99.9 స్వచ్ఛత) ధర జీవనకాల గరిష్ఠమైన రూ.72,250కు చేరింది. అంతర్జాతీయ మార్కెట్లలో పసిడి ధరల ర్యాలీ ఇందుకు కారణమని హెచ్‌డీఎఫ్‌సీ సెక్యూరిటీస్‌ వెల్లడించింది. ఈ వారంలో పసిడి జీవనకాల గరిష్ఠాలను తాకడం ఇది రెండోసారి. కేజీ వెండి కూడా భారీగా పెరిగి రూ.81,194 వద్ద ట్రేడవుతోంది.

• అంతర్జాతీయ మార్కెట్లలో స్పాట్‌ గోల్డ్‌ ఔన్స్‌ (31.10 గ్రాములు) 2,295 డాలర్ల వద్ద ట్రేడవుతోంది. ప్రారంభ ట్రేడింగ్‌లో ఇది 2300 డాలర్లను తాకింది. వెండి ఔన్స్‌ ధర 25.55 డాలర్ల నుంచి 27.05 డాలర్లకు పరుగులు తీసింది.
• అమెరికా ఫెడరల్‌ రిజర్వ్‌ వడ్డీ రేట్ల కోతలకు సంకేతాలివ్వడం, పశ్చిమాసియాలో ఉద్రిక్తతల కారణంగా పసిడికి గిరాకీ పెరిగింది.