Google layoffs: గూగుల్‌లో మరిన్ని తొలగింపులు..?

Google layoffs | ఇంటర్నెట్‌ డెస్క్‌: ప్రముఖ టెక్‌ దిగ్గజం గూగుల్‌ (Google layoffs) మరిన్ని ఉద్యోగాల తొలగింపులకు సిద్ధమవుతున్నట్లు తెలుస్తోంది. 2024 తొలి వారంలో వివిధ విభాగాల్లో ఉద్యోగులను తొలగించిన గూగుల్‌.. ఈ ఏడాదిలో  మరికొంతమంది ఉద్యోగులను కూడా సాగనంపాలని చూస్తోంది. ఇదే విషయాన్ని ఉద్యోగులకు అంతర్గత మెమో ద్వారా సీఈఓ సుందర్‌ పిచాయ్‌ తెలియజేసినట్లు ‘ది వెర్జ్‌’ వెబ్‌సైట్‌ పేర్కొంది.

ఈ ఏడాది ప్రాధాన్యమైన అంశాల్లో పెట్టుబడులు పెట్టాలని నిర్ణయించామని, ఇందుకోసం కఠిన నిర్ణయాలు తీసుకోవాల్సిన అవసరం ఏర్పడిందని పిచాయ్‌ పేర్కొన్నట్లు తెలిసింది. కొన్ని విభాగాల్లో నిర్వహణ ప్రక్రియను సులభతరం, వేగవంతం చేసేందుకు కొన్ని లేయర్లను తొలగించాల్సిన అవసరం ఉందని, గతేడాది మాదిరిగా భారీ స్థాయిలో తొలగింపులు మాత్రం ఉండబోవని అన్నట్లు సమాచారం. అన్ని విభాగాలనూ టచ్‌ చేయబోమని చెప్పినట్లు తెలిసింది.

EPFO కీలక నిర్ణయం.. ఆ జాబితా నుంచి ఆధార్‌ తొలగింపు

గతేడాది గూగుల్‌ 12వేల మంది ఉద్యోగులను తొలగించిన సంగతి తెలిసిందే. గూగుల్‌ చరిత్రలో ఈ స్థాయిలో తొలగింపులు చేపట్టడం అదే తొలిసారి. ఈ ఏడాది సైతం కొన్ని తొలగింపులు చేపట్టింది. యూట్యూబ్‌ వీడియో ప్లాట్‌ఫామ్‌లో వందమంది ఉద్యోగులను తొలగించింది. యూట్యూబ్‌ ఆపరేషన్స్‌, క్రియేటర్‌ మేనేజ్‌మెంట్ విభాగాల్లో ఈ తొలగింపులు చేపట్టింది. అడ్వర్టైజ్‌మెంట్ సేల్స్‌ టీమ్‌లో వెయ్యి మందికి గూగుల్‌ పింక్‌ స్లిప్పులు ఇచ్చింది. వారికి పరిహార ప్యాకేజీని అందిస్తామని, ఇతర విభాగాల్లో ఉద్యోగాలకు దరఖాస్తు చేసుకోవచ్చని గూగుల్ తెలిపింది.