‘గోల్డెన్‌ ఇయర్స్‌’ గడువు పెంపు : ఐసీఐసీఐ బ్యాంక్‌

ఈనాడు, హైదరాబాద్‌: పెద్దల కోసం అందుబాటులోకి తీసుకొచ్చిన ‘గోల్డెన్‌ ఇయర్‌ ఫిక్స్‌డ్‌ డిపాజిట్‌’ వ్యవధిని పెంచుతున్నట్లు ఐసీఐసీఐ బ్యాంక్‌ ప్రకటించింది. 7.5 శాతం వడ్డీ రేటును అందించే ఈ పథకం ఈ ఏడాది అక్టోబరు 31 వరకు అమల్లో ఉంటుందని పేర్కొంది. ఇంతకుముందు ప్రకటించిన మేరకు ఈనెల 7 వరకే ఈ పథకం గడువుండేది. కొత్తగా డిపాజిట్లు చేసుకునే వారితో పాటు, పునరుద్ధరించుకునే వారికీ ఈ రేటు వర్తిస్తుందని తెలిపింది. 5 ఏళ్ల ఒక రోజు నుంచి 10ఏళ్ల వ్యవధికి ఈ డిపాజిట్లు అందుబాటులో ఉన్నాయి. ఈ వ్యవధికి సాధారణ ఫిక్స్‌డ్‌ డిపాజిట్లపై 6.9 శాతం వడ్డీనిస్తుండగా, గోల్డెన్‌ ఇయర్స్‌ ఎఫ్‌డీపై అదనంగా 60 బేసిస్‌ పాయింట్లను చెల్లిస్తున్నట్లు పేర్కొంది.