India GDP: భారత్‌ జీడీపీ వృద్ధి అంచనా 6.8 శాతం-మోర్గాన్‌ స్టాన్లీ

గ్లోబల్‌ బ్రోకరేజ్‌ సంస్థ ‘మోర్గాన్‌ స్టాన్లీ’ 2025 ఆర్థిక సంవత్సరానికి గాను భారతదేశ జీడీపీ వృద్ధి అంచనాను 6.50 శాతం నుంచి 6.80 శాతానికి పెంచింది. పారిశ్రామిక రంగంలో వృద్ధి, మూలధన వ్యయం గణనీయంగా పెరిగిన నేపథ్యంలో ‘మోర్గాన్‌ స్టాన్లీ’ జీడీపీ వృద్ధి అంచనాను పెంచింది. 2024-25 ఆర్థిక సంవత్సరానికి జీడీపీ అంచనా 7.90 శాతంగా ఉందని కంపెనీ తన నివేదికలో పేర్కొంది. గ్రామీణ, పట్టణ వినియోగం..ప్రైవేట్‌-పబ్లిక్‌ పెట్టుబడుల మధ్య అంతరాలు వచ్చే ఆర్థిక సంవత్సరం(2025-26)లో తక్కువగా ఉంటాయని సంస్థ తెలిపింది. ఉత్పాదకత మెరుగవ్వడం వల్ల భారత్‌లో వృద్ధి అవకాశాలు మరింత విస్తరిస్తాయని ‘మోర్గాన్‌’ పేర్కొంది. దేశీయ డిమాండ్‌ వృద్ధి స్థిరంగా ఉండడంతో ఆర్థిక వ్యవస్థకు మేలు జరగనుంది. జీడీపీలో వస్తు/సేవల వినియోగం 60.30 శాతంగా ఉంది.