India GDP: క్యూ3లో జీడీపీ వృద్ధి 8.4%

దిల్లీ: ప్రస్తుత ఆర్థిక సంవత్సరం (2023-24) మూడో త్రైమాసికంలో దేశ ఆర్థిక వ్యవస్థ 8.4 శాతం వృద్ధి నమోదు చేసింది. తయారీ, మైనింగ్‌, నిర్మాణరంగాలు పుంజుకోవడంతో ఇది సాధ్యమైంది. ఈమేరకు కేంద్ర గణాంక కార్యాలయం (NSO) గురువారం సంబంధిత గణాంకాలను వెల్లడించింది. అలాగే ప్రస్తుత ఆర్థిక సంవత్సరానికి సంబంధించి రెండో అంచనాలను గణాంక కార్యాలయం వెలువరించింది. 2023-24 ఆర్థిక సంవత్సరానికి గాను జనవరిలో 7.3 శాతం వృద్ధి నమోదవుతుందని అంచనా వేసింది. తాజాగా దాన్ని 7.6 శాతానికి సవరించింది. 2022-23 ఆర్థిక సంవత్సరానికి జీడీపీ వృద్ధి రేటు అంచనాలను 7.2 శాతం నుంచి 7 శాతానికి తగ్గించింది.